Celtic an chak nghal

Boston Celtic tan Jayson Tatum (28 pts), Al Horford (26) leh Terry Rozier (29) te an khel ṭha a, nimin zing khan Philadelphia 76ers chu NBA Eastern Conference semifinal-ah 117-101 in an hneh.

Nimin zing inkhelah hian NBA vawi khat khelhna Celtics forward Tatum chu Sixers rookie Ben Simmons aiin a khel ṭha zawk. Celtic ṭantute chuan Simmons chu 'Rookie a ni lo' tiin an au a. Hei hi a chhan chu Simmons tan tun season hi a vawi khat inlanna ni mah se 2016 draft-a number 1 pick a nih tawh vang a ni a, amaherawhchu inhliam vangin 2016-17 season-ah a inlan lo.

2017 draft number 3 pick Tatum a khelh ṭhat zawk takah chuan Celtic ṭantute chuan tih el nan Simmons chu 'Rookie a ni' tiin an au el a, amaherawhchu Sixers guard hi khel chhia tih tur chu a ni lo - point 18 lai a nei thei tlat.

Sixers star Joel Embiid chuan, "Defence aṭangin a inṭan a, kan zir angin kan khel lo. Kan khelh ṭhat niah chuan defence nei ṭha ber team-ah tel pha a, game 1-ah erawh kan lantir lo," tiin an theihna anga an khelh loh thu a sawi. Boston-in vawi 17 zet 3 points an lut a, point 31 neitu Embiid hian an defence a sawisel hi a mak lo.

Tukin zing dar 5:30 hian Toronto Raptors leh Cleveland Cavaliers ten semifinal game 1 an khel dawn a, dar 8:00-ah Golden State Warriors leh New Orleans Pelicans ten game 2 an khel ang. GSW hian game 1-ah 123-101 in hnehna an chang.

Naktuk Ningani zing dar 5:30 hian Utah Jazz leh Houston Rockets ten game 2 an khel leh dawn a, Rockets hian game 1-ah an star James Harden hmangin 110-96 in hneh a, 1-0 in hma an hruai mek.