Watford aia hriam zawk Spurs

Tottenham Hotspur chuan season thara Champions League khel turin an dinhmun a sawhnghet zel. Thawhṭanni zan Premier League inkhelah Mauricio Pochettino naute hian an mikhual Watford chu 2-0 in an hneh.

Tottenham tan Dele Alli leh Harry Kane ten goal an khung a, Wembley Stadium-a hnehna an chan avang hian point 71 hmuin palina an nih chhunzawm. League match thum khelh tur an la neihah an mahni aia vawi khata khel tam zawk Liverpool chu point khatin an phak lo–Chelsea aiin point ngain an sang zawk thung.

Goal hnih
Spurs lamin Watford goalkeeper Orestis Karnezis tihsual an chhawr ṭangkai a, Karnezis-a'n nuamsa taka ball man tur nia ngaih a ti per a, ball dawngtu Christian Eriksen-a'n Alli tan a siamsak a. England international midfielder hian minute 16-naah yard 12 lek aṭangin goal hmahruai a khung.

Second half-ah Son Heung-min-a cross ṭha tak chu Kane-a'n a tluk vangin pet hman lo mah se, ball kaltlang mual sir lehlam aṭanga defender Kieran Trippier siamsak chu nuamsa taka pet lut turin a tho chhuak.

Spurs goalkeeper Hugo-a'n Lloris Andre Gray leh Richarlison te khung tur ṭha zetin a dan sak a, Richarlison hian yard ruk lek aṭangin a pet over bawk–hun tawp dawnah Jan Vertonghen chuan goal ban a tauh per bawk.

Golden Boot
Premier League goal khung hnem ber hnena hlan ṭhin Golden Boot dawn tumin Kane leh Mohamed Salah an inum chho zel. Liverpool forward Salah-a'n goal 31 khung tawhin hmahruaitu a ni a, match khelh hmabak pahnihah Chelsea leh Brighton & Hove Albion te an hmachhawn dawn.

A zawna season hnih goal khung hnem ber ni tawh Kane-a'n a vawi thum nan dawn a tum a, goal 27 a nei tawh thung. England international hian an match hnuhnung pariatah goal hnih chiah a khung a, chung zingah chuan April 7-a Stoke laka a goal sawi hlawh pawh a tel a ni.

Spurs hian West Brom, Newcastle United leh Leicester City te an la hmachhawn dawn a, Kane-a tan top scorer kawng a la inhawng a, London club tan Champions League khel turin point thum hlawhchhuah a pawimawh bawk. Chutihrualin

kum 24 mi Kane hian goal khung mah se tun hma lam a chetṭhat lai angin a hriam tawk lo. Hun ṭha vawi hnih a hlah hnuah a goal khung pakhat chu offside vanga pawm a ni lo a, Belgium defender Vertonghen ball tauh rawn let chu khung theih tura ngaih ni mah se ho takin a pet fuh lo bawk.

Poch a lungawi
Tottenham manager Mauricio Pochettino chuan a nauten huaisen taka hnehna an chang thei chu a lawm thu a sawi. Poch chuan, "Hnehna kan chan avangin a sang pali zinga tel turin kan dinhmun kan sawhnghet zel a, season tluanin kan khel ṭha tih a lantir nghal bawk.

"Hnehna chan ngei mamawh chungin Watford kan hmachhawn a, kan khelh dan leh goal khung zat chu duhthusam a ni lo a nih pawhin a pawimawh ber point thum kan hmu a ni," tiin a sawi.

Tottenham hian tun hnaiah a zawnin league match 23 chhung goal an khung ta a, tun season an match hnuhnung pathuma an khung kim a nih chuan April 1987-a record an lo siam tawh match 26 chhung a zawna goal khung chu an nihrual thei dawn a ni.

Watford an him lo?
Watford tan season chawhnu lamah hun ṭha a inherchhuak thei meuh lo. Hornets hi league table-ah 13-na ni mek mah se 18-na ni lai Southampton aiin point ruk chiahin an sang.

Newcastle United leh Manchester United te an la hmachhawn dawn avangin point hmuh belh lo thei dinhmunah an ding. Amaherawhchu, match hnih aṭangin point hnih an hmuh belh thei a nih chuan midang inkhel result ngaichiang miah loin chhiarkawp danin an inhamtang thei dawn.

Javi Garcia naute buaina ber chu goal hmaah a ni a. Garcia kaihhruaina hnuaiah match 13 khel tawhin goal kua chiah an khung a, heng zingah hian Chelsea 4-1 ngawt an sawp a tel thung.

Spurs lakah pawh an khel chhe lo viau. Mahse, Hugo Lloris an paltlang thei tlat lo. Janaury thla a Marco Silva an ban lai khan 10-na an ni a, Portuguese coach an hnawl hnuah hma lam an pan chak lo hle.

Gracia erawh a lungngai lo, Hornets boss chuan, "Goal khung turin hun ṭha kan insiam thei a, a khung tak kan harsat tlat hi a mak hle. Tottenham lam khan chance vawi khat an neihah an khung nghal a, keini erawhin kan hlah hnem hle.

Tunah hian kan dinhmun a la him tawk a, season dang zawng aia ṭhain hun tawp kan hman theih ka beisei," tiin a sawi.