CSK an la kal zel

Indian Premier Lea­gue khelh mekah Chennai Super Kings-in an hmahruaina an chhunzawm zel - Thawhṭanni zan khan Delhi Dare­devils chu run 13-in an hneh a, Mahendra Singh Dhoni tar lohzia kan hmu zel bawk.

Pune khawpuia inkhelah Chennai an bat hmasa a, opener Shane Watson-a'n run 78 a siam nghal avangin an dinhmun a ṭha nghal - Watson bakah hian MS Dhoni a ropui a, India captain hlui hian run 51 siamin a tawp thleng a dam.

CSK hian over 20-ah run 211 an siam a, wicket li an hloh. Chennai an bat ṭhat avangin Daredevils bowler zingah wicket khat aia tam la thei an awm lo a, Delhi tan target a huphurhawm.

Delhi bat hun a thleng a, Prithvi Shaw (9 runs), Colin Munro (26) leh Shreyas Iyer (13) te hma taka an out hnuah Rishabh Pant (79 runs) chuan beiseina thar a rawn siam.

Vijay Shankar-a'n run 54 siamin a tawp thleng a rawn dam ve bawk a, mah se hun erawhin a daih ta lo - over 20-ah run 198 an siam a, wicket nga an hloh. Run 13-in Delhi an tlawm a, CSK-in hma an hruai chhunzawm zel.