Bethlehem leh Kanan an champion

Aizawl DFA 2017-18 season chhunga an inelna hnu­hnung ber Season Ending Tournament chu nimin khan Lammualah khelh zawh a ni a. Second Division inelnaah FC Bethlehem an champion a, Third Division inelnaah Kanan FC-in nomawi an chawi ve bawk.

Bethlehem hian Durtlang FC chu 2-0 in an hneh a, Adolf Lalrochana Sailo leh Ramdintluanga ten goal an khung. Kanan FC-in Lalhriatzela, PC Lianhmingthanga leh Lalremruata te goal hmangin Ramthar Veng 3-0 in an hneh.

An nghak chhuak ta
FC Bethlehem hi kum 2002 khan din a ni a, kum 10 hnuah South Zone champion niin Second Division an kai. FCB hian thui zawk thlen tumin ruahmanna an siam a, amaherawhchu an tum ram an thleng thei lo.

Season ruk chhung Second Division-a an awm hnuah James Lalnunsanga Sailo kaihhruaina hnuaiah Season Opening final-ah Durtlang FC hnehin an champion a, first division kai turin an dinhmun a ṭha. Season Ending tournament-ah pawh Durtlang FC bawk hneihin an champion.

FCB-in an club history-a a vawi khat nan First Divsion League an khel dawn ta a, hemi thleng tur hian nomawi ṭum hnih an chawi bawk.

Club president Lalruatsanga chuan, "Kan bei rei a, kan ṭang rei a, kan tum ang result kan neih loh avangin kan zuai hman. Mi ṭhahnem ngai zarah kan kal hram hram a, player, coach leh manager te zara first division kan kai ta hi kan lawm hle a ni," tiin Vanglaini a hrilh.

Durtlang FC pawh first division khel turin an tling a, MPL aṭanga tla thla Dinthar FC bakah FC Venghnuai, Chaltlang FC, Zo United, Electric Veng leh AFC Academy te nen division khatah an awm ang.

Kanan an tling
Kanan FC chuan season thara Second Division khel turin Third Division - Season Ending Tournament-ah Ramthar Veng chu 3-0 in an hneh. Kanan FC leh Season Opening Tournament champion AFC Academy Jr te Second Division khel turin an tling.

Tun ṭum inelnaah hian AFC Academy Jr hi I League Under 18 an khelh dawn avangin semifinal-ah an inhnukdawk a, chu ti chung chuan Third Division club zingah point an hmu sang ber.

Season thara Second Division khel turte chu Zarkawt FC, 1st Bn MAP Academy, Sihphir Venghlun, Young Star United, Venghlui FC, Ramhlun FC bakah kai thar AFC Academy Jr leh Kanan FC te an ni ang.

Thlirna Tawi
Second Division
Champion FC Bethlehem
Runner Up Durtlang FC
Fair Play FC Bethlehem
Top Scorer Lalrintluanga, (4 Goals FC) Bethlehem
Best Player R.Lallawmawma FC Bethlehem

Final
FC Bethlehem 2 - 0 Durtlang FC
FCB : Adolf Lalrochana Sailo 63'; Ramdintluanga 90'

Third Division
Champion Kanan FC
Runner Up Ramthar Veng FC
Fair Play Kanan FC
Top Scorer Lalhlimpuia, (12 Goals) Zauva Memorial FC, Electric Veng
Best Player MS Dawngliana, Kanan FC

Final
Ramthar Veng 0 - 3 Kanan FC
KFC : Lalhriatzela 7'; PC Lianhmingthanga 51'; Lalremruata 74'