Goal 400 khung thei Villa

Major League Soccer club New York City tana khel lai David Villa chuan goal 400 a khung tling ta. Spain international hian Thawhlehni khan a club hi FC Dallas lakah 3-1 in hnehna a chan­pui a, goal hnih a khung.

Kum 36 mi Villa hian MLS club tan hian 2014 aṭang khan a khel ṭan a, goal 68 a khung tawh. Valencia, Barcelona leh Atletico Madrid tan pawha khel tawh striker hian football a khelh hun chhungin goal 401 a khung tling ta a, ram tan pawh match 98 aṭanga goal 59 khungin ani aia khung hnem an awm lo.

Tun dinhmuna la inkhel lai zingah Cristiano Ronaldo, Lionel Messi, Luis Suarez leh Zlatan Ibrahimovic te bakah Samuel Eto'o te chuan goal 400 an khung tling tawh a, player goal khung thei leh khung hnem chungchuang bikte huangah a awm ve ta a ni.

Spain tana goal khung hnem ber Villa chuan, "Hun rei tawh tak aṭang khan goal 400 a khung tling ve ngei ang tiin duhthu ka sam ṭhin a, tunah chuan 400 bakah 401 ka khung tling ta. Ka kum a tam tawh leh tam lohah ka buai lo a, a pawimawh zawk chu beiseina leh phurna neih zel a ni. Tunah chuan ka hun tawna ropui leh chhinchhiah tlak ka tawng leh ta a, tawp san mai ka la tum lo.

"Mellung pawimawh ka phun theih chhan chu teammate leh coach ṭha tak tak ka neih ṭhin vang a ni a, an tan ka theih­tawp ka hlan let ve leh ṭhin," tiin a sawi a, Villa hian a dam ṭha a nih phawt chuan inkhelh chawlhsan mai a la tum loh thu a sawi bawk.