Champions League râuin Real a awm pui

Europe club-te tana inelna sang ber UEFA Champions League-a vawi 12 champion tawh Real Madrid chungah vanneihnain thla a zar a, Spanish club lian hian semifinal-ah Bayern Munich chu aggregate-ah 4-3 in an hneh.

Champions League final hi May 26, Inrinni zan dar 12:15-ah kheh an i dawn a, kum hnih a zawna champion tawh Zinedine Zidane-a hoten Ukraine khawpui Kiev-ah nizana Liverpool leh AS Roma te inkhel chak zawk an hmachhawn ang.

Goal a lut
Los Blancos-in Allianz Arena-ah 2-1 in hnehna an chang a, amaherawhchu Thawhlehni zana Santiago Bernabeu a inkhelah Bayern-in Joshua Kimmich hmangin minute thumna lekah hma an hruai a, Spanish club-in hlauthawngin hun an hmang tluan.

Real hian Karim Benzema goal hnih hmangin an hmahruaina an belhchhah zui a. Amaherawhchu, Bavarians-in James Rodriguez hmangin minute 63-naah an chhanglet a, second leg-ah 2-2 ni chiahin final thlen nan goal khat mamawh belh mah se goal dang hmuh tur a awm tawh lo.

Beisei nei Bayern
Bayern-in chak tumin bul an ṭan a, goal an khung hma a, goal hnih an chhuah hnuah pawh an beidawng lo.

Rodriquez hmanga second leg bika an sipurh an sut hnuah 'away goal rule' hmanga chak turin goal khat an mamawh a, darkar chanve hun an la neih bawk avangin inkhel a hmuhnawm hle.

Bavarians tan midfield-a Tolisso, James leh Thiago te inthlawp a hmuhnawm a, Real-in midfield-ah an ngam lo. Los Blancos-in Dani Carvajal awm lo an tuar a, right back phuahchawp Lucas Vazquez chu Croatian midfielder Luka Modric-a'n a pui nasa a, Real an buai tih phat rual a ni lo.

Amaherawhchu, Muller leh Lewandowski ten ṭum dang an pha lo a, an mamawh ber goal an khung miau loh avangin Bayern kawng tawpna chu semifinal a ni.

Vanneih leh thiam inpawlh
Real Madrid-in hun ṭha an neih chhunah Bayern tlarhnung an tibuai thei zel a, an thiam tih a lang a, tun hmaa an sawi vul ṭhin Los Blancos nena khaikhin atan erawh an patuai deuh niin a lang.

Zinedine Zidane-a hoten dinhmun siam ṭhat nan Bayern keeper Ulreich-a tihsual chu an hmang ṭangkai a, Los Blancos hian first leg-ah Rafinha tihsual hmangin goal an khung tawh bawk a, minute 180 chhungin Bavarians-in langsar takin ṭum hnih an tisual a, Real an vannei.

Chutihrualin Real hian final thleng turin last 16-ah French champion Paris St-Germain an hneh a, quarterfinal-ah Italian champion Juventus an hneh leh a, semifinal-ah German champion Bayern an hneh leh avangin thiam a tel tih chu a chiang a ni.

Tlawm duh lo
Real Madrid manager Zinedine Zidane chuan, "Tlawm duh lohna hian Bayern ang thoin keimahniah zung thuk takin a kai tawh. Team pahnihin a tawp thlengin ka bei a, inkhel ropui tak a ni a. Hetiang vang hian football zunzamah kan uai phah ṭhin," tiin a sawi.

Inkhel chungchang sawiin Zidane chuan, "Champions League semifinal chin hi chu a harsa tur a ni hrim hrim a, final kan thlen tho avangin kan harsatna tawn khan kan lawmna a belhchhah," tiin a sawi a, goal hnih khungtu Benzema leh an lama goal lut tur dangtu Navas a fak bawk.

Bayern Munich manager Jupp Heynckes chuan, "Kan khel ṭha hlein ka hria a, ka ngaihdanah chuan inkhel pahnihah team ṭha zawk kan ni. Amaherawhchu, football-ah chuan hetiang hi a thlen chang a awm," tiin an vanduai thu a sawi.