Asian Champions Trophy khel tur Mizo nula Lalremsiami

May 13 aṭangin Donghae City, South Korea-ah Asian Hockey Champions Trophy khelh a ni dawn a, India tan Mizo nula Lalremsiami chu a inlan dawn a, champion lai India tan hian defender Sunita Lakra chu captain a ni dawn.

Nikum khan Kolasib nula Siami telna India team hian nomawi an chawi tawh a, Thenzawl Women Hockey Training Centre aṭanga zir chhuak hi match zawng zawngah inlan vekin goal hnih a khung thei–kuminah pawh Mizo forward hi a ti kimtu a ni satliah lo ang. April thla tira neih Commonwealth Games-ah pawh khan Siami hi India tan a fehchhuak tawh a, semifinal thleng mah se medal erawh an hlap chhuak zo lo thung.

India captain Sunita chuan, "CWG-a kan chak lohna kha a na kan ti a, chutihrualin team ṭha Australia leh England te nen kan inel tawk viau avangin hma kan sawn tih a chiang. Training kan nei ngawrh a, inbuatsaihna a ṭhat avangin tun ṭumah hian beiseina pawh kan nei sang," tiin a sawi.

India Squad
Goalkeepers: Savita, Swati.
Defenders: Deepika, Sunita Lakra (C), Deep Grace Ekka,
Gurjit Kaur, Suman Devi Thoudam.
Midfielders: Monika, Namita Toppo, Nikki Pradhan,
Neha Goyal, Lilima Minz, Navjot Kaur, Udita.
Forwards: Vandana Katariya, Lalremsiami, Navneet Kaur, Anupa Barla.