Serena tan thu lawmawm

Serena Williams chu Wimbledon-ah seeded pakhatna a ni thut mai thei! All England Club chief executive Richard Lewis chuan Serena hi duhsakna pek tlak nia an ngaih thu a sawi chhuak.

American nula Seren hian nau a hrin vangin a inkhel lo rei a, world ranking-ah pawh 449-naah a tlahniam hman. A rawn kir hnuah pawh beisei angin a hlawhtling nghal lo a, hmeichhe player-te chu fa neih vanga an chawl a nih chuan an rawn kir hunah an ranking humhim se a duh thu a sawi.

Richard Lewis pawhin Serena thusawi hi a ṭawmpui a, "WTA-in seeding leh ranking a kalpui dan hi siamṭhat ngai lai chu a awm niin a lang a, ennawh ni se a duhawm hle," tiin a sawi.

Grand Slam-ah chuan ranking-a a sang 32 te seeded an ni ṭhin a, a lan dan chuan Serena hian qualifying a khelh a ngai dawn. Mahse, major tournament buatsaihtute hian thuneihna chen an nei ve tho a, an player duhsak zawng chu wildcard pawh an pe thei. Vawi sarih a champion tawhna hmunah Serena hi an duhsak bik a nih pawhin a mak lo ang.