Thla thar; Award thar; 1 Salah

May a ni a, Mohamed Salah tan chuan thla dang ang tho a ni - award a dawng leh ta. Liverpool forward hi Football Writers' Association Footballer of the Year-ah thlan a ni.

Egyptian King tia hminglem an pek hian April khan Premier League mimal chawimawina ngaihhlut ber Professional Footballers' Asso­ciation Player of the Year chawi­mawina a lo dawng tawh bawk.

PFA Award nen thawnthu a danglam tam lo - Manchester City midfielder Kevin de Bruyne chu pahnihna a ni a, Tottenham striker Harry Kane chu pathumnaah a awm thung.

A hming Salah
Nipui transfer lai khan Liver­pool-in Roma aṭangin Salah hi an lalut a, a man zat atana an insen zat chu pound maktaduai 34 a ni - Egypt international hi nipui transfer bazar-ah meuh chuan pound maktaduai 100 chuang man a ni tawh ang.

Salah hian tun season inelna hrang hrangah goal 43 ngawt a khung tawh a, nizana Roma nen an inkhela a chet dan a zirin a goal khung zat hi danglam leh thei a ni - Premier League bikah chuan match 34 khelin goal 31 a khung tawh.

Kum 25 mi forward hian tun season-ah record awmsa a thaibo reng a ni ber mai - African player zinga FWA Footballer of the Year ni thei hmasa ber a ni a, African player zingah PL season khata goal 30 khung tling thei hmasa ber a ni bawk.

Premier League match hnih khelh tur a la hmabakah goal khat chauh pawh a khung leh a nih chuan PL season match 38 a nih hnua goal 32 khung thei hmasa ber a ni nghal ang.

Mi pahnih
FWA Footballer of the Year chawimawina hi mi pahnih inbeihna a ni ber - vote tla zinga 90% chu Salah leh Belgian forward De Bruyne-ten an insem vek. FWA chairman Patrick Barclay chuan 1968-69 season-a Manchester City defender Tony Book leh Derby County midfielder Dave Mackay ten award an dawn dun hnua player pahnih inhnaih ber ṭuma nih thu a sawi.

Patrick Barclay chuan, "Kar hmasa tawp vel thleng kha chuan De Buryne-a'n vote a hmu ṭha zawk a, Salah hian a rawn hnaih em em bawk. Mahse, Roma laka goal hnih a khung hnuah Salah a tla na lehzual a, a tawpah a dingchang zawkah a ṭang ta a ni," a ti.

Player pahnih leh Kane bakah Sergio Aguero (Man City), Christian Eriksen (Tottenham), Roberto Firmino (Liverpool), Nick Pope (Burnley), David Silva (Manchester City), Raheem Sterling (Man City) leh Jan Vertonghen (Tottenham) te chu vote hmu zingah an tel.