Atletico Madrid mikhual tur Arsenal ; Arsene Wenger tan inkhel pawimawh bik

Zanin dar 12:35 hian Atletico Madrid leh Arsenal ten Europa League final lut tur zawk an chingfel dawn a, Gunners manager Arsene Wenger tan inkhel pawimawh bik a ni dawn–goal an khung lo a nih chuan European football an mangṭha ang.

Premier League-a parukna ni lai Arsenal hian Emirates Stadium-ah an mikhual Atletico Madrid hi 1-1 in an inhnehtawkpui tawh a, khualmuala goal khung tawh Atletico tan final lut tur chuan goal venhim a tawk.

Goal a ngai
Goal khung thiam tia hriat hlawh ṭhin Wenger-a nau ten fist leg-ah goal an khung hleithei lo a, an goal khat neih sa an hum zawh loh bawk avangin an hna a hautak tawh dawn. Striker manto ber Pierre-Emerick Aubameyang chhawr theih a nih loh avangin Alexandre Lacazette leh Danny Welbeck te chungah mawhphurhna a sang zual dawn.

Striker pahnih te hi kartawpa Manchester United an hneh loh ṭumin hahchawlhtir an ni a, midfielder Aaron Ramsey leh Mesut Ozil te pawh Old Trafford-ah an lut lo. United lakah goal khungtu Henrikh Mkhitaryan a dam tawh a, Armenia international hian Atletico a hmachawn a nih chuan ven a ngai ang. Alex Iwobi, David Ospina leh Sead Kolasinc te pawh Madrid-ah an thlawk lut thei bawk.

Goal mamawh Gunners-in hmatawngah Lacazette an dah leh dawn a, Lyon striker hlui hi a palen loh avangin tharum ngah Atletico tlarhnung tana dan theih tak tur a ni. Chutihrualin France international hi a che rangin ball a thiam a, leiah ball an pek tam a ngai dawn. Ozil, Ramsey leh Jack Wilshere ten goal nawr an puih a ngaih dawn avangin, tlarhnunga awm Shkodran Mustafi leh Laurent Koscielny te pui turin Granit Xhaka mawhphurhna a sang dawn–Switzerland international tan ho lam taka ball hloh leh pass sual a pawi thei ang.

Kawng a awm
Season tawp ruala chhuak tur Arsene Wenger-a'n a hun hnuhnungah nomawi chawi a duh a, amah ngainatu leh hmangaihtute pawhin Europa League champion ni chung ngeiin chawl se tih chu an duh dan a ni, "Eng pawh ni se ka thutlukna siam apiang chu Arsenal ṭhatna tur a ni ang," titu tan Gunners player ten thapui an thawh ngei ang.

Sawisel leh deusawhna karah Wenger a zam ngai lo a, a chhuah tur thu a sawi hnuah phei chuan "Wenger Out" tia au ṭhin zawng zawng pawh alamah an ṭang let leh vek tawh. Boruak sang tawng ṭhang tawh manager-in a naute a fuih ṭhat a ngai dawn a, a ven dan leh a khung dan a hrilhfiah a ngai bawk dawn.

Mikhual tana inkhelh harsatna hmun San Siro-ah si hnih faiin hnehna an chang thei a, Italian club ṭha AC Milan hi an vanglai ni rih lo mah se Gennaro Gattuso kaihhruaina hnuaia insiam thar an nih avangin anni hneh hi sawi nep theih a ni lo–tun laia mahni mual hmang thiam berte zinga mi Atletico Madrid mualah chak loh inring sa ngawtin an leng lut dawn lo. Wenger-a'n, "Hnehna chan tumin Spain-ah kan zin ang," tiin a sawi tawh.

Hun hnuhnung?
Fernando Torres-a'n a chawr chhuahna Atletico Madrid tan kum naupangte ni chungin captain armband a hreng thei a, a hmangaih hmasa hi chhuahsan mah se a kum tam hnuah a kir leh–tun season tawp rual hian a vawi hnih nan an inmangṭha dawn.

Diego Simeone-a'n team ṭha leh ngelnghet tak a din a, chutihrualin a player ṭhenkhat tan erawh an hun hnuhnung a ni tawh thung. Torres bakah hian kum 34 mi Gabi, rightback Juanfran (33), central defender Diego Godin (33), leh Filipe Luis (32) te tan season thar nghah ai chuan kumin hi an hun hnuhnung a ni ve tawhin a lang bawk.

Barcelona leh Real Madrid te el phak khawpa indin thei Atletico hi tun season La Liga-ah pahnihna ni mah se, forward Antoine Griezmann leh goalkeeper Jan Oblak te hma hun a chiang lo nia sawi a ni bawk.

First leg-a goal khat khungtu Griezmann hi an elpui Barcelona lamin lakluh an duh nia sawi a ni a, Atletico tana goal 161 khung tawhtu hian 2014 nipui laia Atletico a pan hnuah nomawi a chawi lo rei ta hle–chona thar hmachhawn turin Catalan club a pan rin a ni. Tun season chhunga vawi 27 clean sheet nei tawh keeper Oblak pawh sum ngah Paris St-Germain nena sawi zawm mek a ni.

Los Rojiblancos (Atletico Madrid sawina) hian August 2014-a Spanish Super Cup an chawi bak nomawi an la chawi leh lo a, Argentine manager-in a team din ṭhat sa hmanga Europa League nomawi chawi leh a duh a nih chuan tun hi a hun ṭha chu a ni.

Kulhpui Nghet
Tun season aṭangin Atletico Madrid-in an khelmual Wanda Metropolitano an hmang ṭan a, mipui 67,703 zet lenna stadium hi thlamuanpui tham khawpin an hmang thiam tawh. An khingpui tur Arsenal ang lo takin Atletico hian goal venhim an thiam a, he an thiam thil hi Simeone-a'n 2011 aṭanga a enkawl hnua an neih thar a ni.

Spanish club hian an khelmualah a zawnin match 11 chhung goal an chhuah lo tawh a, Europa League bikah hian an mikhual pathum FC Copenhagen (1-0), Lokomotiv Moscow (3-0) leh Sporting Lisbon (2-0) te chu hneh vekin goal khat pawh an chhuah lo–La Liga goal chhuah tlem ber (18 goals) hian khualmuala an inhnehtawkpui tawh Gunners dan chah an huphurh tehchiam lo ang tih a rin theih.

Atletico hian minute 80 chuang Emirates Stadium-ah player kim loa an khel chung pawhin an tlarhnung a khawng ṭha a, attacking game khel ṭhin Arsenal lakah goal khat bak an chhuah lo; zaninah pawh a khung ai chuan a venhim an ngai pawimawh zawkin a rinawm a, English club tan hna a hautak dawn.

Chutihrualin an intawn hmasaka hnawhchhuah Sime Vrsaljko leh hliam Luis a inlan theih a la beiseiawm loh avangin nidang angin an khawng tawk lo thei thung. Spanish club tana chanchin lawmawm loh pakhat chu coach Simeone-a'n a uap thei dawn lo–Argentine coach hi London-a an inkhelh ṭumin hnawhchhuah a ni ve bawk a ni.

Goal ven thiam team hian a khung turin hmatawng an nei ṭha tawk bawk. Chelsea striker hlui Diego Costa hliam a dam tawh a, Spain international hian tawnhriat a ngah tawhin a huaisen bawk, a inlan a nih chuan player naupang zawk Griezmann tan inrintawkna a pek belh thei ang. Kum 34 mi Torres bakah Angel Correa te chu inkhel boruak thlak danglam thei tur an tling bawk.