FIFA-in Africa ram pawisa pe lawk dawn

FIFA chuan Africa khawmualpui aṭanga World Cup khel tur ram panga Egypt, Morocco, Nigeria, Senegal leh Tunisia te hnenah an pawisa dawn tur aṭangin dollar maktaduai hnih an pe lawk dawn.

Confederation of African Football chuan FIFA nena an inremna avang hian Africa ramte hian player-te hnena lawmman an pek turah buaina an pumpelh theih an beisei.

CAF chuan, "World Cup hmasa lama sum chungchanga buaina khan African football hmel a ti bal a, team khelh dan thlengin a ṭha lo lamin nghawng a nei a ni," tiin buaina ngaiah buai nawn an tum lo.

Kum 2014 World Cup-ah khan sum chungchang avangin Cameroon an thlen tlai phah a, Ghana player nuar tur thlem lungawi nan sorkar pawh inrawlhin dollar maktaduai thum an theh chhuak a, Nigeria pawhin practice an ṭhulh bawk.

Africa aiawh turte
Egypt-in Liverpool star Mohamed Salah an nei a, Group A-ah inelna thlengtu Russia bakah Saudi Arabia leh Uruguay te nen an awm. Tun ṭum hi an vawi thum telna tur a ni a, 1934 leh 1990 khan an tel tawh a ni.

Morocco chu Group B-ah Portugal, Spain leh Iran te nen an awm a, 1998 World Cup hnua an vawi khat telna tur chiah ni mah se football inelna sang berah hian ṭum li (1970, 1986, 1994, 1998) an lo khel tawh a, team thar an ni lo.

Tunisia chu Group G-ah England, Belgium leh Panama te nen an awm a, tun ṭum hi Morocco ang thoin an vawi nga telna tur a niin 1978, 1998, 2002 leh 2006 te khan an inlan tawh a ni.

Senegal hian tun hmain World Cup vawi khat chauh la khel mah se kum 2002 World Cup-ah champion lai France an hneh nghal avangin hming an chher hle. Tun ṭumah hian Group H-ah Poland, Senegal, Colombia leh Japan te nen an awm.

Africa ram aṭanga ram langsar ber chu Nigeria an ni a, tun ṭum hi an vawi ruk telna tur a ni a. Germany-in kum 2006-a World Cup an thlen ṭum tih loah chuan kum 1994 aṭangin an la inlan char char a. Group D-ah Argentina, Iceland leh Croatia te nen an awm.

Lawmman a pung
FIFA hian kum 2014 khan lawmmanah dollar maktaduai 358 an sem ral a, tun ṭumah hian dollar maktaduai 400 an theh chhuak dawn.

World Cup hmasa lam ang thoin final round lut pha team-te hian dollar maktaduai riat ṭheuh an dawng dawn a, knockout stage aṭangin lawmman hi a pung.

Kum li liam ta khan champion team Germany khan dollar maktduai 35 an dawng a, kuminah chuan champion team-in pound maktaduai 38 an dawng tawh dawn.