FA chungah Kane a lungawi lo

Tottenham striker Harry Kane chuan twitter lama FA Cup account-in fiamthu thawh nana an hmang chu, "thil atthlak tak a ni," tiin a sawi.

Spurs hian April 21 zan khan Manchester United chu FA Cup semifinal-ah an hmachhawn a, 2-1 in an tlawm. He inkhelah hian England tana Kane-a khelhpui Chris Smalling chuan Kane a dah 'nil' a, hei hi FA Cup chuan twitter lamah fiamthu thawh nan an hmang.

FA Cup account hian, "Chris, i ipetah khan enge awm?" tiin zawhna an tarlang a, a hnuaiah Smalling-a'n, "Harry Kane," tih a sawi lai video chu an dah a ni. FA chuan hemi chungchangah hian ngaihdam dilna a ti chhuak tawh a, Kane erawh a la dam thei lo.

Kane chuan, "Coach Mauricio Pochettino hnenah ka sawi tawh a, min chhanna chu 'ram dang chuan an player lakah khatiang khan an ti ve ngai lo ang' tih hi a ni.

"Mahse kar hnih liam ta vela thil thleng a ni tawh a, ngaihven reng pawh ka tum tawh lo. Thil atthlak tak a ni tih chu kan hriat vek kha. Tunah chuan kan match khelh leh tur chiah ka ngaihtuah tawh a ni," a ti.

Kum 24 mi striker hian tun season Premier League-ah match 34 khelin goal 27 a khung tawh a, goal 31 khungtu Mohamed Salah chiah a phak tawh lo.