Salah ropuina Liverpool chak nan a tawk lo
"Hei chu football video game ang mai a ni. Thil theih a ni lo - khatiang goal kha chu joystick (game khelhna) lo chuan khung theih a ni lo," tiin commentator Peter Drury chuan Mohamed Salah goal khung ropui chungchang a sawi a, ṭawmpui loh chu tih theih a awm lo.
Liverpool thiampuipa Salah-a'n Sadio Mane goal khung tur a siamsak bakah goal ropui bik a khung a, Anfield-a inkhelah mualneituin vawi hnih ngawt hma an hruai.
Mahse, City-in Phil Foden leh Kevin de Bruyne hmangin si phurh an sut zel a, inkhel hmuhnawm bikah team pahnih hi 2-2 in an ṭin - stadium chauh ni lo, khawvel hmun hrang hrang aṭanga inkhel ente mit a tlai a, team pahnihin football mawina an pho chhuak.
Premier League-a champion rinkai pahnih inkhelah chak zawk an awm lo a, Chelsea-in table chung ber an luah chhunzawm phah - Liverpool leh City ten an dawt a, English top flight football a ngaihnawm chho zel dawn.
City an chungnung
Jurgen Klopp-a'n kartawp Premier League-ah Manchester City an mikhual dawn tih hre chungin Champions League-a Porto an hmachhawnna inkhelah a player neih ṭhat berte bul a ṭantir a, 5-1 ngawtin hnehna an chang.
City lakah Klopp-a'n Porto laka a player rinte bawk a rawn ring nawn a, hliam vanga inlan thei lo Trent Alexander-Arnold aiah James Milner chungah bawk rinna a nghat nawn a, German coach a chetsual phah tiin a sawi theih.
Pep Guardiola-a'n Paris St-Germain laka chak lo hlim aṭangin player pahnih a thlak danglam thung a, Raheem Sterling leh Riyad Mahrez aiah Gabriel Jesus leh Phil Foden chu Jack Grealish kawp turin a luhtir a, a chesual lo.
Kum 35 mi Milner-a dinna lam chu City-in Liverpool nawr nan ber an hmang a, mual vei lama Foden, KDB leh Joao Cancelo te goal rawn nawr chu Reds tan a hlauhawm ṭhin - first half inkhel aṭanga teh chuan Liverpool tan chak a beiseiawm loh a, City goal khung hun chu kan nghah a ni.
Liverpool danglam
First half ham rik a ri a, Klopp-a'n hmanhmawh takin dressing room lam a pan a, sawi tur a ngah tih a chiang - German coach-in chawlhlawk laiin sermon a thlak fuh niin a lang a, inkhel ṭan aṭangin Reds an hlauhawm nghal.
Minute 59-naah Liverpool-in goal an rawn khung ta nge nge - Salah-a'n ṭha taka ball a khalh hnuin Sadio Mane tan a siamsak a, Senegalese forward hian chak taka ball a tlanpui hnuin harsatna nei loin goal-ah a chantir. Anfield thawm chu ring tak a ni.
Mahse, Liverpool mikhual hi City an ni a, hnual chi an ni lo. Milner tana mangchhia thlentu Foden-a'n Jesus hnen aṭanga ball a hmuh hnuin City tan si phurh a rawn sut a, Anfield thawm a reh ve ta thung.
Foden a khel ṭha takzet a, Milner-a'n English rawlthar duhawm hi chelh ngaihna a hre lo a ni ber - Foden laka yellow card chawi tawh Milner hi Bernardo Silva-a tih tluk avangin hnawhchhuah ngei tur niin a lang a, mahse, referee zahngaihna a dawng.
Saa la la la Salaahhh
Foden-a'n goal a khung hnuah football khawvelin rei tak a hriat tawh tur thil a hmu a, a sawifiah dan awlsam ber chu 'magic' a ni. Minute 76-naah Salah-a'n City player pathum ven karah mawi zetin ball a put pui a, Bernardo Silva leh Aymeric Laporte a 'mangṭha' zui hnuah goal a khung!
Anfield chu a chim dawn emaw tih mai tur khawpin thawm a ring a, Jurgen Klopp-a'n, "Khawvela footballer ṭha berte chauhin khatiang goal kha chu an khung ṭhin," tia a sawi chuan Salah goal khung ropuina a sawifiah ber niin a lang.
Salah hian Liverpool tan tun season-ah match kua khelin goal kua a khung a, assist vawi thum a nei bawk - Liverpool-a a season hmasa bera 'one season wonder' tia season khat bak daih lo tura an ngaih hian a daih rei ta hle.
Mahse, City an beidawng bik lo - hun tawp nan minute kua chiah a awm tawh tihah KDB chuan a rawn khung ve leh a, Joel Matip-a'n a lo dan per avangin Reds goalkeeper Alisson-a dive sual a, hun tawp thlenga goal dang lut loin team pahnih an inhnehtawk.
Danglamna
City-in first half-ah inkhel an thunun chungin goal an khung lo a, a tawpah point khata lungawi an zir a ṭul phah tiin a sawi theih - team pahnih inthlauhna langsar tak chu tlarhma a ni a, City-in tlarhmaah player an nei ṭha tawk lo niin a lang.
Liverpool tlarhmaah Salah (103 goals), Mane (99) leh Diogo Jota (28) ten Premier League-a goal an khung tawh belhkhawm chu goal 230 a ni a, City tlarhmaa Jesus (52), Foden (16) leh Grealish (16) ten Premier League-a goal an khung belhkhawm 84 hian Mane goal khung zat pawh a phak lo.
A hmawr bawk hunah City lamin a hmawr an bawk thei lo a, second half-ah goal hnih an khung avangin chhuanlam nei ṭha mah se first half-ah game titawp thei an ni tawh - chutihrual chuan Liverpool erawh chance neih ruala danglamna thlen thei ṭhiau player pathum tlarhmaah an awm a, chumi pholangtu chu Mane leh Salah goal a ni.
First half aṭanga buk lung khai dawn chuan City-in chak zawk nih an phu a, second half aṭanga teh erawh chuan City an vannei takzet - minute 86-naa Fabinho-a'n goal ruaka a pet luh hmaa Rodri-a'n a lo dan hmante kha en chuan Anfield-a point khat vanga lawm tur zawk chu City an niin a lang.
'James Milner kha Silva laka a foul khan a yellow card pahnihna hmu tur a ni a, yellow card chiang tak a ni. Mahse, Anfield leh Old Trafford a nih chuan referee-ten thutlukna siam an harsat ṭhin a, khatiang dinhmunah khan ding ve ta ila, City player chu an hnawt chhuak ang. Khatiang ang game inhnehtawkah kha chuan referee khan yellow card phawrhna turah chuan a phawrh ngei turah ka ngai. Anfield a ni miau a, Milner kha hnawhchhuah ni ta se kan chak phah ngei ang tih ka sawi thei lo. Mahse, yellow card pahnihna erawh pek ngei tur a ni. Kan khelh danah erawh ka lawm a, vawi khat chauh ni loin, vawi hnih vel lai tih ṭhat kan nei a, chu chuan min tilawm a ni. Hun harsa kan tawh laia insiamṭhat thiam hi a pawimawh a, first half kan khelh ṭhat viau hnuah 1-0 leh 2-0 in kan hnufual a, mahse, kan insiamṭha leh thei a ni.
Tihsual neih hnua insiamṭhat hi champion-na tur chu a ni kher lo mai thei a, mahse, thinlung a tilawm a ni.' - Pep Guardiola, City manager
Milner-a'n a yellow card pahnihna a hmuh loh avangin Pep kha a lung a awi lo khawp mai. Mahse, kei chuan chiang takin ka lo hmu lo a, Pep kha ka hmuh chu a ni. City tlarhma hi ven an har ṭhin a, Milly khan first half chu a khel ṭha viauin ka hria. Salah goal kha goal ropui bik a ni a, kum 50 emaw kum 60 liam hnuah pawh sawi a la ni reng dawn a ni. Game hmuhnawm tak a ni a, first half leh second half kha a danglam viau bawk. First half-a kan khelh dan kha chu City laka khelh loh dan tur dik tak a ni a, second half-ah City laka khelh dan tur takin kan khel thung - football-a chawlhlawk a lo awm hi chu a lawmawm ngawt mai!
First half-a kan tihsual lian ber chu football kan khel lo kha a ni. Stadium-ah football inkhel en turin fans an lo pungkhawm a, chutihlaia football khelh loh chu a dik thei lo a ni. Kha vang khan second half-ah insiamṭhat kan mamawh a, kan insiamṭha ta reng bawk. Second half aṭang chauha thlir tur chu ni se point thum loa lungawi ka harsatin ka ring a, mahse, first half-a kan khelh dan en tel chuan point khat pawh hi a hlu alawm. - Jurgen Klopp, Liverpool manager