FIFA Futsal World Cup champion Portugal

Pathianni zan khan FIFA Futsal World Cup chu Kaunas, Lithuania-ah khelh zawh a ni a, final hmuhnawm takah Portugal chuan champion lai Argentina chu 2-1 in an hneh. Portugal tan World Cup nomawi an chawina hmasa ber a ni a, an champion theih nan Pany-a'n goal hnih a khung.

Portugal captain Ricardinho chu best player a thlan a ni a, Argentina goalkeeper Nicolas Sarmiento chu best goalkeeper-a thlan a ni thung. Pathumna inchuhnaah Brazil chuan Kazakhstan chu 4-2 in an hneh a, Brazilian forward Ferrao-a'n tun inelnaah hian goal kua khungin top scorer a ni.

Final hmuhnawm
Argentina hi champion lai an ni a, Portugal-in nomawi la chawi lo mah se kum 2000 khan final an lut tawh. Portugal captain Ricardinho tan inelna liana ram tana a inlan hnuhnun ber a nih tawh hmel avangin inkhelh ṭan hmaa a mittui tla pawh a mak hran lo.

'O Magico' tiha hminglem an pek Ricardinho hian, "Ka interntional match hnuhnung ber atana duhthusam chu World Cup nomawi hi a ni," tiin a lo sawi tawh a, a duhthusam thleng tur hian a thawkrim hle.

Final-ah pawh hian Ricardinho hi a khel ṭha a, chutihrualin an champion theihna kawngah goal khung thei bik player Pany a ṭangkai. Kum 32 mi Pany hian match rukah goal a khung a, knockout stage chinah goal a khung vek.

Argentina nen hian Pany-a'n minute 15-naah goal hmahruai a khung a, minute 28-naah goal hnihna a khung leh bawk. Portugal hian Cristian Borruto red card hmuh an hmang ṭangkai a, Argentina player pakhata an tlem laiin goal hnihna hi an khung.

Portugal-in 2-0 a hma an hruai hnuah Claudino hmangin Argentina-in siphurh an sut ṭhen a, champion lai La Albiceleste hian hun tawp thlengin na takin nawr mah se Jorge Braz leh a hote an ṭang tluan thei hram.

An sawi zui
Portugal tana goal khungtu Pany chuan, "Portugal hi khawvel champion an ni a, chu chu a pawimawh ber chu a ni. Euro kan champion khan kan vanneih vangah an ngai a, mipuin min ring lo. Kei chuan kan phu vanga champion kan ni tih ka hria a, team ṭha berah ka inngai," tiin a sawi.

Argentina defender Maxi Rescia chuan, "Theihtawp kan chhuah a, goal ban kan pet per a, an keeper-in save a ngah hle. Kan vanduai ṭum a ni a, theihtawp kan chhuah avangin kan team hi ka chhuang a ni," tiin a sawi ve bawk.

Best player atana thlan Portugal captain Ricardinho chuan, "National team-ah hian kum 18 ka khel ta a, hlawhtlinna ṭhahnem tak ka chang tawh. Chutiang zawng zawng zingah chuan tun hi ka hun tawha ropui ber a ni a, best player-a min thlan hi ka lawmna belhchhahtu a ni bawk," tiin a sawi.