Muguruza tan nomawi pahnihna

Garbine Muguruza chuan Ons Jabeur chu darkar khat leh minute 37 chhungin 3-6, 6-3, 6-0 a hnehin Chicago Fall Tennis Classic-ah a champion a, tun season kal laiah WTA Tour title pahnih a vuak chhuahna chiah a ni nghal bawk.

Pathianni zan final inkhelah Muguruza a chefuh lo hmasa, set khatnaah a service a hloh avangin a hniam zawkah a ṭang. Mahse, set hnihna aṭangin a che buai tawh lo, a khingpui service a chhuhsak bakah set hnuhnung berah phei chuan game a hloh miah lo.

World number 1 hlui Muguruza tan tun season bikah nomawi pahnihna chauh ni mah se, tennis a khelh hun chhungin WTA singles title pakua a lak tlinna a ni tawh a, season tawpa khelh tur WTA Finals-a inlan turin a dinhmun a siamṭha mek bawk.

Spanish nula Muguruza chuan, "Kan duh leh tum anga thil a thleng lo a nih pawhin huaisen a ngai, set khatnaah khan kawng engkimah ka hnufual. Mahse, beidawng loa ka beih avangin a tawpah chuan ka chak," tiin a sawi.