Durand Cup-ah Papuia telna Goa an champion

5th October, 2021

Asia rama football inelna upa ber Durand Cup-ah Mizo tlangval Lalhmangaihsanga (Papuia) telna Goa an champion. Pathianni zan final hmuhnawm takah Goa hian Mohammedan SC chu extra time-a captain Edu Bedia goal hmangin 1-0 in an hneh.

Durand Cup hi vawi 130-na a ni a, FC Goa hi an vawi khat champion-na a ni. Champion ngun ber chu Mohun Bagan leh East Bengal te an ni a, vawi 16 ve ve nomawi an chawi.

Mizo telna
Salt Lake Stadium-ah final khelh a ni a, FC Goa tan Papuia'n bul a ṭan a, Armed Veng South tlangval hian Durand Cup match zawng zawngah bul a ṭan vek. Mohammedan lamah keeper Zothanmawia (T. Mawia) leh defender Lalramchullova ten bul an ṭan a, bench aṭangin second half-ah Brandon VL Remdika a lut bawk.

Kolkata club-in forward Marcus Joseph hmangin chance an nei hmasa a, Mohammedan striker hian goal zawnah a pet lo. Goa pawhin Nemil leh Romario te hmangin chance a nei a, keeper T. Mawia tan dan a harsa lo.

Second half-ah ISL club Goa-in inkhel an thunun a, goal khung tumin nawr na mah se tlarhmaah an hriam tawk lo. Chutihrualin tlarhnungah Papuia telna Goa tlarhnung a phui ṭha hle.

Minute 90 chhung goal a lut lo a, extra time khelh a ni. Spanish midfielder Bedia-a'n minute 105-naah freekick aṭangin a khung a, keeper T. Mawia'n a hna a ṭha thawk tawk lo.

Mohammedan lamin siphurh sut tumin an nawr let a, captain Nikola Stojanovic pawhin ṭha takin goal-ah pet mah se keeper Naveen Kumar-a'n a dansak. ISL club Goa-in 1-0 in hnehna an chang.

Mizo tlangval Papuia
FC Goa hian champion turin group stage-ah Army Green (2-0), Sudeva Delhi (2-1) leh Jamshedpur (5-0) te nen awm hoin an hneh vek a, knockout stage-ah Delhi (5-1), Bengaluru (2-2, 7-6 pen) leh Mohammedan (1-0) te an hneh.

ISL club-in match ruk an khelhah hian Mizo tlangval Papuia hian match zawng zawng a khel kim vek. Papuia hi Armed Veng South tlangval a ni a, Chhinga Veng FC leh Aizawl FC bakah Shillong Lajong junior team-ah te a inzir tawh.

Papuia chuan, "Inelna lian tham chu a danglam khawp mai. Salt Lake a ni kher bawk si a, entu an tam si a, pressure pawh a sang hle. Chutihrualin ka khelh danah ka lungawi a, coach te pawh an lawmin ka hria. Kan champion hi ka lawm takzet a, ISL-a khelh phak tumin theihtawp ka chhuah ang," tiin Vanglaini a hrilh.

Mizo tlangval Papuia hian kum 2019 khan FC Goa reserve team a zawm a, tun season-ah senior team-ah hlangkai niin inelna hmasa berah an champion nghal a, player pawimawh a ni.