Austin chu Marquez tana siam a ni

Marc Marquez tan Circuit of the Americas hi hmun ṭha bik a ni a, tunah pawh a la ni reng. Pathianni zana tlan zawh tak Grand Prix of the Americas-ah Honda rider hian hnehna a chang a, a tlankawng hman thiamah hian vawi sarih a chakna a ni - ani aia chak hnem an awm lo.

Pathumna aṭangin tlan ṭan mah se, rei lote chhungin Marquez hian a hmasa ber aṭanga tlan chhuak Francesco Bagnaia a pel nghal a, nghet taka hma hruai chhunzawmin a tawp thlengin harsatna dang a tawk lo.

Rider championship lama hmahruaitu Fabio Quartararo chu pahnihnaah a thleng a, pathumna chu Bagnaia a ni thung. Spanish rider Marquez hian hliam vangin season tir lamah inelna hmachhawn lo mah se, tunah chuan pasarihna dinhmun a luah leh tawh.

MotoGP champion vawi ruk ni tawh Marquez chuan, "Engkim kha ruahman ang vekin a kal, a tirah chak takin ka tlan nghal a, a tawp lamah min rawn nawr buai deuh mah se harsatna lian tham a thleng lo," tiin a sawi.

Bike intlansiakna sang ber hi season kal laiah tlan hmabak pathum chauh a awm tawh. Hmahruaitu Quartararo-a'n amah hnaih bertu Bagnaia aiin point 52 zetin a hmu hnem zawk a, a chesual viau a nih ngawt loh chuan Yamaha rider hi a champion ang.

October 24, Pathianni hian Emilia Romagna Grand Prix an tlan leh ang - chumi hnuah Algarev GP leh Valencia GP te an la tlan leh dawn bawk.