Watford-in Ranieri an dawr

Premier League club Watford chuan coach Xisco Munoz an ban hnuah Italian coach Claudio Ranieri an dawr nghal a, he thuziak i chhiar meuh chuan Leicester City boss hlui hi an lalut fel tawh hial mai thei.

Kum 41 mi Xisco hian December 2020 khan Watford hi a enkawl ṭan a, Premier League khel turin a hruaikir nghal. Mahse, league match sarih an khelh aṭanga point sarih chiah an neih avangin Xisco an ban a, Inrinni zana 1-0 a Leeds United an ngam loh chu Spanish coach hnuaia an match hnuhnung ber a ni.

Watford neitu Pozzo chhungkua hian manager thlak hi an chem kalna lam tak niin a lang. Kum 2012-a Watford an lei hnuah manager 14 an thlak tawh a, Ranieri pawh hian an beisei ang result a pek loh chuan an dim lo ang.

Kum 69 mi coach hian 2015-16 season khan Leicester City chu Premier League nomawi a chawipui a, infiamna khawvela thil thleng langsar ber pawl a ni. Kum 35 chhung chu football coaching-ah a hun a hmang tawh a, hetih chhung hian nomawi pariat a chawi hman.

Chelsea leh Fulham pawh lo enkawl tawh coach hian Watford hi a enkawl a nih chuan a club 21-na a ni dawn chiah a, nipui lai khan Italian club Sampdoria chu a chhuahsan a, hemi hnu hian club nei loin a awm reng a ni.

February 2017-a Foxes-in an ban hnuah pawh khan Ranieri hian Nantes, Fulham, AS Roma leh Sampdoria a enkawl leh hman tawh a, hna a van lo hle.