Barcelona hmaah Real Madrid an tlawm
Champions League-ah FC Sheriff Tiraspol ngam loin an mualpho zo chauh a, Real Madrid an insiamṭha hman lo - league-ah 2-1 in Barcelona an ngam lo zui a, tun ṭuma an ngam loh Barca erawh Ronald Koeman-a enkawl Barca ni loin RCD Espanyol de Barcelona an ni thung.
Espanyol tan Raul de Tomas leh Aleix Vidal ten goal khat ve ve an khung a, Real tan Karim Benzema-a'n si phurh rawn sut ṭhen mah se mualphona lak ata Real a chhanhim zo chuang lo - Real hi Sheriff laka an tlawm hma khan league-ah Villarreal nen 0-0 in an inhnehtawk tawh a, an match hnuhnung pathumah an chak zo lo tihna a ni.
Real tlawm mah se La Liga match riat khelh tawhah point 17 neiin hma an hruai chhunzawm zel a, mahse, an hnuaia awm Atletico Madrid leh Real Sociedad te nen an point hmuh zat a inang.
Beisei loh result
Sheriff Tiraspol laka tlawm kha Real tan chuan mualphona tawpkhawk a ni a, an insiamṭha dawn emaw tih laiin club tenau Espanyol lakah an tlawm leh ta - Carlo Ancelotti-a'n insiamṭhat an mamawhna lai a ngaihtuah a ṭul.
Barcelona khaw club Espanyol tan Raul de Tomas chuan minute 17-na lekah Adrian Embarba-a low cross aṭanga a ball hmuh chu goal hmahruai ni turin a khung a, mikhual Real a barakhaih.
Madrid khaw club-in rang takin an chhanglet dawn emaw tih laiin goal dang lut loin chawlhlawk hman a ni a, minute 60-naah Aleix Vidal chuan ṭha zetin mualneitu tan a rawn khung belh ta zawk.
Benzema a tawk lo
Real an hawihai a, chak tur chuan minute 30 la awmah goal thum an khung a ngai - minute 71-naah Benzema chuan a team tana beiseina siam turin si phurh a rawn sut ṭhen a, mahse, goal dang khung tawh loin hun tawp thleng an hmang a, Real an tlawm.
Kum 33 mi Benzema hian tun season-ah Real tan league match riat aṭangin goal kua a khung leh der tawh a, assist vawi sarih a nei tel bawk - inelna hrang hrangah match 10 khelin goal 10 a khung bawk.
Real tan Eder Militao chuan goal khungna remchang nei ve bawk mah se corner aṭanga ball kal chu a tauh out a, a tawpah 66% ball changa vawi 18 zet shot nei chungin Real an tlawm.
Carlo a lawm lo
Real boss Carlo Ancelotti chuan, "Kan khel chhe takzet a, sawi belh tur pawh a awm vak lo. Tum neiin bul kan ṭan a, mahse, kan tumah kan chiang rei thei lo a ni. Goal kan chhuah hnuah kan talbuai a, tun season-a kan la khelh chhiat ber a ni.
"International break kan nei hlauh a, kar khat vel chhung leka kan team rilru puthmang danglam chhan hi kan ngaihtuah chhuah a ngai a ni," a ti a, international break chhawr ṭangkai a tum.
October 13 thleng international break neih a ni dawn a, Real-in chawlh zawha an match hmasa ber chu October 17-ah an khel dawn a, La Liga-ah Athletic Bilbao an mikhual ang - khawvelin Real insiamṭhat leh ṭhat loh a thlir dawn.