Durand Cup final MC R. Malsawma

Mizo football-ah chanchin chhinchhiahtlak a awm a, Asia rama inelna upa ber Durand Cup final-ah Mizo pa R. Malsawma chu match commissioner a ni. Tun hnai khan All India Football Federation-in India rama MC 80 bawr vel awm ṭhin aṭangin 52-ah a thlifim a, Asawma hi Mizo zinga AIFF MC hmasa ber Lalrawngbawla nen an tel a, India hmarchhakah mi pathum chauh an awm.

Durand Cup final-a MC R. Malsawma chuan, "Kum 2006 khan Kolkata-ah hian lehkha zirin ka lo awm tawh ṭhin a, S. Malsawmtluanga te zarah a thlawnin inkhel kan en ve ṭhin. Salt Lake Stadim hi chu a ropui a, entu nih ringawt pawh hi a nuam ka ti. Kum 2017 khan ka ṭhianpa nen East Bengal leh Mohamedan inkhel en turin Salt Lake-ah hian kan lut ru tawh bawk.

"Tun hmaa kan hun tawnte ka chhui kir a, lung a leng hle. Tun ṭumah erawh Salt Lake Stadium-ah ngei mai Durand Cup final-ah Match Commissioner ni thei a, ka awm kha chu hnuk te pawh a ulh teuh hle," tiin Vanglaini a hrilh.

Chanmari mi Asawma hian Durand Cup-ah hian match 10 a enkawl a, tun hmain MPL-ah match commissioner hna hi a lo thawk tawh bawk. Asawma chuan sawi chhunzawmin, "Mahni theihna zawnah hmasawn zel hi kan mamawh a, Mizoram tan theihtawp chhuah zel ka duh. Footballer-ten thui tak tak an thleng a, referee leh coach lamah pawh hma kan sawn hi a ṭul a ni," tiin a sawi a, inelna buatsaihtu Armed Forces of India leh Govt of West Bengal te a fak tel bawk.