Bayern Munich-in Frankfurt an hneh lo

Bundesliga champion Bayern Munich chuan Pathianni zan khan Eintracht Frankfurt 2-1 in an hneh lo a, Julian Nagelsmann hnuaia an chak lohna hmasa ber a ni.

Allianz Arena-a inkhelah hian Leon Goretzka (29') hmangin Bavarians-in goal an khung hmasa a, Frankfurt hian Martin Hinteregger (32') leh Filip Kostic (83') hmangin an lehthal. Bayern hian point 16 hmuin hmahruaitu la ni tho mah se Bayer Leverkusen nen an point hmuh zat a inang a, Borussia Dortmund lakah point khat chiahin a fal bawk.

Pathianni zan inkhelah German football thununtu Bayern Munich-in bul an ṭan ṭha a, inkhelh ṭantirh aṭangin a nawrtu zawk ni nghalin chance pawh an ngah malh malh hle. Robert Lewandowski, Thomas Muller, Serge Gnabry leh Niklas Sule ten chance ṭha an hlah vek hnuah Goretzka-a'n Lewy siam chu minute 29-naah ṭha zetina khung.

Goal luh hnuah pawh Bayern tan Leroy Sane-a'n chance ṭha a nei a, Frankfurt keeper Kevin Trapp-a'n a dang ṭha takzet. Mikhual team-in chance an neih hmasak berah goal an khung a, corner aṭana ball kal chu Hinteregger-a'n minute 32-naah a tauh goal.

Bayern-in chak tumin na takin an nawr a, Gnabry leh Lewy ten hnai tak aṭangin an hlah a, Frankfurt keeper Trapp a che ṭha takzet. Bayern keeper Manuel Neuer pawhin first half tawp hma hretin save ṭha bik nei mah se minute 83-naah Kostic-a ball pet a chhuah a, a ti ṭha tawk lo. Frankfurt-in keeper Trapp-a zarah Allianz Arena-ah 2-1 in an chak.