Kan vanduai a ni - Pochettino

Paris St-Germain manager Mauricio Pochettino chuan Rennes 2-0 a an hneh lo chu an vanduai vang niah a ngai. Ligue 1 lamah 100% chak record an neih lai a tawp ta mai chu pawi a tih thu a sawi bawk.

Pathianni tlai khan PSG hi Rennes mualah an lenglut a, tlarhma lamah Lionel Messi, Neymar leh Kylian Mbappe te intlar mah se goal an khung lo, goal an khung lo pawh a ni satliah lo, target zawna pet an nei lo hial.

PSG manager Poch chuan, "Goal khan khung lo kha a pawi, a bik takin first half tawp lam minute 25 chhung kha chu ka khel ṭha takzet a, vanduai thlak takin a hmawr kan bawk fuh thei lo tlat erawh a pawi.

"International break a awm zui dawn a, chumi hnuah tun thla chhungin match khelh tur pali ngawt kan la nei dawn, rilru fim taka ngaihtuahna sen hun a ni," tiin a sawi a, an chak loh avangin player-te dem a tum lo.

Messi-a'n PSG a zawm hnuah league goal a la khung lo, Argentina captain hian Champions League-ah goal mawi khung mah se league-ah a la ropui thei lo. World Cup qualifier khel tura a feh chhuah dawn avangin an league match khelh leh hmasak turah a inlan a rinawm loh bawk.