Atalana hnehtu AC Milan

AC Milan chuan an mikhualna ramah Atalanta 3-2 in an luhchhuah a, point 19 nei tawhin Serie A table-ah pahnihna dinhmun an luah - hmahruaitu Napoli chuan match sarih aṭangin point 21 an nei thung.

Pathianni zan Serie A inkhel dangah Napoli chuan Fiorentina 2-1 in an hneh a, manager thawmna Jose Mourinho enkawl AR Roma pawhin an mikhual Empoli chu 2-0 in an hneh ve bawk.

Milan an chak
Atleti Azzuri d'Italia-a inkhelah mikhual Milan lamin minute khatna lek aṭangin goal an khung ṭan. Davide Calabria (1'), Sandro Tonali (42') leh Rafael Leao (78') te goal hmangin 3-0 in hma an hruai thei.

Hun tawp dawnah Duvan Zapata chuan penalty aṭangin goal khat a sut ṭhen a, 90+4-ah Mario Pasalic chuan an goal hnihna khung ve leh bawk mah se awmzia a nei phak tawh lo a, tun season league match bika a vawi hnih nan an tlawm.

Milan manager Stefano Pioli chuan, "Duhthusama ṭhain kan khel, Atalanta khan engtik lai pawha min nawr buai reng avangin a tawpa goal kan chhuah kha chu a mak lo. Serie A bakah Champions League-ah hetianga khelh chhunzawm hi ka duh," tiin a sawi.

Chak lo Atalanta coach Gian Piero Gasperini pawhin Milan fakin, "Second 30 lekah goal kan chhuah a, hun chanve hmain goal dang kan chhuah leh bawk. Kan inrinrtawkna a bo a, kan tan tih theih a awm lo, kawng engkimah min thunun," a ti.

Napoli 100%
Goal khat phur hmasa mah se Napoli kaltluang lai dan theih an ni lo. Fiorentina tana Lucas Martinez Quarta goal khung chu mikhual lamin Hirving Lozano leh Amir Rrahmani te hmangin an chang let a, khualmualah point thum an hlawh chhuak.

Luciano Spalletti naute hian Serie A match sarihah a zawnin hnehna an chang ta, season tira match li an chak zawn kha record a ni tawh - tunah chuan an record ṭha ber hi an khum zel a, match sarihah hian tih tawp mai an duh lo ang.

Napoli manager Spalletti chuan, "Goal khat khung belh zauh thei ni ila chuan kawng a awlsam ang, mahse a harsa tawh ṭhin. Kan chak avangin ka lawm a, record hi kan ngaih pawimawh ber a ni lo, match khat bak kan ngaihtuah lawk thei lo," a ti.

Inkhelh banah Spalletti hi Mourinho nen TV-ah an lang dun. Portuguese manager Mourinho chuan, "In match lehpek chu khualmualah a ni dawn a, in chak lo ang," tiin a elpui manager hi a fiam.

Match 42!
Jose Mourinho a nih tawh chuan record hrang hrangin a zui ṭhin. Mourinho enkawl Roma hian Henrikh Mkhitaryan leh Lorenzo Pellegrini te goal khat ve ve hmangin Empoli 2-0 in an hneh a, tun season bikah anmahni muala league an khelhin an la chak vek.

Potuguese manager Mourinho hian 2008 khan Inter Milan a lo enkawl tawh, a hun hmasa leh tun hun chhiar zawmin - mahni muala Serie A match a khelh pui hnuhnung 42-ah tlawm a nei lo. Massimiliano Allegri-a'n September 2015 leh September 2017 inkara record a lo siam tawh chu a khum.

Mourinho chuan, "Kan ṭhat dan berin kan la khel chhuak lo zawk, hliam leh harsatna vangin player ṭhenkhat an inlan thei lo. Chutiang karah chuan point thum kan hmu thei tho," tiin a naute khelh danah a lungawi thu a sawi.

Roma tan hian Chelsea aṭanga an lakluh Tammy Abraham a inlan a, English striker hian goal khung lo mah se bar a tih per. Tun season-ah Roma tan woodwork vawi ruk ngawt a tih per tawh, vannei se chu goal tam zawk khung thei dinhmunah a ding tihna a ni.