Brentford an sang zel

Premier League kai thar Brentford an hmuhnawm chhunzawm a, match hmasa bera Arsenal an hneh kha tihpalh thil tih a ni lo tih a takin kan hmu zel - Thomas Frank-a naute hian West Ham United 2-1 in an luhchhuah.

Brentford tana winger Bryan Mbeumo goal khung chu minute 10 chauh awm tawhah Jarrod Bowen-a'n sut mah se, minute 90+4-ah Yoane Wissa chuan chakna goal a khung. Premier League kai thar hian league match sarihah vawi thum chakin ṭum thum dang chu an inhnehtawk - vawi khat chiah chak loh an nei.

Manager Frank chuan, "London khawpui chauh pawh ni lo, West London bakah hian khawvel hmun danga mite chuan min hre lo ang. Chuvangin miin min hriat theih nan khelmual chhungah ṭha taka kan khelh a ngai ṭhin.

"Premier League-ah ṭha takin kan khel thei ang tih hi ka ring tlat a, tlarhnung lam vengṭha chunga goal nawr kan thiam a pawimawh. Ka naute an huaisen em em a, tuna point 12 kan hmuh tawh hi a chhuanawm hle," tiin a sawi.