Dan theih kan ni lo - Spurs manager

Tottenham Hotspur manager Nuno Espirito Santo chuan, a naute chuan inrintawkna nen an khel chhuak thei a nih chuan dan theih loh khawpa ṭha an nih thu a sawi chhuak - a thusawi hi pawm leh pawm lo tu an awm ang.

Pathianni zan Premier League inkhelah Spurs hian an mikhual Aston Villa chu 2-1 in an hneh hram. North London Derby-a mualpho hliam khan tunah chuan point thum an hlawh chhuak leh ta a, beiseina pawh an nei leh tawh.

Tottenham tan Pierre Emile-Hojbjerg-a'n minute 27-naah goal hmahruai a khung, a siamsaktu chu Son Heung-min a ni. Villa tan second half-ah Oli Watkins chuan siphurh a sut ṭhen a, point insem tur ang in an lang hman.

Mahse, Villa defender Matt Targett chuan anmahni lamah a ti lut palh. Targett hi dem theih a ni lo, forward Son-a'n chak taka ball a tlanpui hnua a shot dan a tumna lamah an goal-ah a ti lut a ni, an chak lohna goal a ni bawk.

North London club chak mah se an lawm erawh a la kim lo. A thiampuipa Harry Kane-a'n goal a la khung lo. England captain hian Lucas Moura nen remchang an insiam hnuah a hlah a, season hmasa lama a kawppui fuh tak Son nen in chawm viau mah se a vannei tawk lo bawk a ni.

Hun tawp dawnah Kane hian keeper Hugo Lloris hnen aṭanga a ball hmuh chu ṭha takin a la thla a, keeper Emiliano Martinez chauh hmachhawn tawh mah se Argentina international hian a lo dansak - ball per hi pet nawn mah se Martinez bawkin a lo dang.

Spurs manager Nuno chuan, "Hnehna chan hi a pawimawh, phu taka hnehna chan theih phei chu a duhawm leh zual ngei ang. Team ṭha tak lakah hnehna kan chang thei a, ka nauten fak chawp ngai loin an khel ṭha tihna a ni," tiin a sawi a, anmahni thlawptu fans chungah lawmthu a sawi bawk.