Liverpool tan Lallana-a’n contract pawtsei

Adam Lallana chuan tun season tawp thlenga Anfield-a cham turin Liverpool-ah contract thar a ziak. England international hi June 30 hian a contract a tawp dawn a, mahse Covid-19 vanga league khelh hun chhung tihsei a ngaih tak avangin July thla chhung atan contract hi a ziak leh a ni. 

Premier League hi March 13 khan Covid-19 vanga chawlh lailawk a ni a, June 17 khian khelh chhunzawm leh tum a ni. Reds hian point 25-in hma an hruai mek a, kum 30 chhunga a vawi khat nan league nomawi chawi thei dinhmunah an ding.

Inhliam vangin Lallana hi season hnih chhung chu a inkhel mumal lo a, tun season kal mekah league match 15 khelin goal khat chauh a khung. 

Kum 32 mi Lallana goal hi Manchester United laka siphurh sutna a ni a, Old Trafford-ah minute 85-naah goal a khung avangin Reds-in point hlu tak an hlawh chhuak a, season tawp thlenga Liverpool kawr hak hi a phu.

Kum 2014 khan hetih hunlaia Liverpool manager Brendan Rodgers-a’n pound maktaduai 25-in Southampton aṭangin a lalut a, season thar atan Leicester City nen sawi zawm mek a ni.

Reds manager Jurgen Klopp chuan, “Lallana hian dawrtu a ngahzia ka hria a, kan team tana a inpe hi ka lawm takzet. Season tawp thleng kan hnena cham a, a phu ang ngeia pangngai taka kan thlah thei tur pawh ka lawm a, he team ka enkawl hnua Reds tana a ṭangkaizia hi ka sapṭawng thiamin a sawifiah zo lo,” tiin a sawi.