India leh player 10-a khel Bangladesh inhnehtâwk

India chuan Maldives-ah SAFF Championship-a an game hmasa ber chu nimin khan an khel a, Bangladesh nen intumin 1-1 in an inhnehtawk. Bangladesh hian minute 54-na aṭangin player 10-in an khel a, coach sawisel hlawh Igor Stimac-a naute'n an hneh zo chuang lo.

Inkhel ṭan a ni a, India hian bul an ṭan ṭha zawk a, Liston Colaco leh Udanta Singh-te an hmuhnawm fu a; a tir minute 20 chhunga 70% ngawt ball changtu India hian minute 26-naah goal an kung ta a, Udanta Singh chuan club leh ram team-a a captain Sunil Chhetri tan a siamsak a, 1-0 a ni.

Second half-ah si phur tawh sa bangladesh dinhmun tichhe zual turin Bishwanath Ghosh hnawhchhuah a ni a, Liston Colaco-a ball lalut tur titlutu hi minute 54-naah hnawh chhuah niin India hi chak ngei tura ngaih an ni. Nimahsela India hian goal an thun belh thei lo a, minute 59-naah Mizo tlangval Lalengmawia (Apuia) luh hnuah pawh player 10-a khel Bangladesh hi an la hlauhawm zel.

Minute 74-na a ni a, Bangladesh lam corner hmuh chu Yeasin Arafat chuan ram tana a goal hmasa ber ni turin tlu chungin a tauh lut a, hun tawp thlengin 1-1 a ni.

SAFF Championship-a vawi sarih champion tawh India hian Nepal, Bangladesh, Sri Lanka leh a thlengtu Maldives an la hmachhawn dawn a, an inkhelh kual hnua a sang pahnih-in final an khel ang.