Hmana ropui thin Liverpool tun 'hun' atan

Kum 2007 chu kum 11 liam ta kha a ni a, khawvel her danglamtu thil tam tak a thleng leh daih tawh a, uar taka sawi dawn chuan 'rei tawh tak' a ni–he kum hi Liverpool-in Champions League final an khelh hnuhnun ber a ni a, AC Milan lakah an tlawm.

Khatih hunlaia Liverpool coach chu Rafael Benitez a ni a, Spanish manager hnuah Roy Hodgson, Kenny Dalglish, Brendan Rodgers leh Jurgen Klopp an nei leh tawh–ni e, manager pali lai an neih leh tawh hnuah Liverpool chuan Champions League final an lut ve leh ta.

Nilaini zan khan Liverpool hian khualmualah AS Roma 4-2 in ngam lo mah se first leg-ah 5-2 in an lo hneh tawh a, inkhel pahnih belhkhawmah 7-6 a hnehna chang chungin final an lut–May 26 zan dar 12:15-ah Real Madrid nen champion an inchuh ang.

Rome khawpui, i mawi mang e!
Kum 1977 khan Liverpool chuan a vawi khat nan European Cup nomawi an chawi a, hei hi Rome khawpuiah a ni. Kum sarih a liam a, AS Roma ṭantute thinlung hliam turin Rome khawpuiah bawk Italian club hi an hneh a, European Cup nomawi an chawi nawn.

Kum 2018 a ni tawh a, Liverpool-in Rome mipui 'velh' an bansan hleithei lo. Stadio Olimpico-ah tun inelnaa a vawi khat nan tlawm mah se Anfield-ah hna 'chanve' an lo thawh tawh sa avangin Liverpool an tlang a, second half-a Roma goal khung pathum chu scoreline timawitu chauh a ni.

Liverpool-in 5-2 a hma an hruai sa avangin inkhelh hma hauhin tlang chiang saa ngaih an ni a, chutih-rualin Barcelona laka 3-0 a comeback thei Roma hi tam takin thaibo an harsat. Mahse minute riatna lekah Sadio Mane chuan Reds tan goal hmahruai a khung nghal a, Liverpool tan hna a harsa tawh lo.

Beidawng duh lo Roma
Dejan Lovren-a'n ball petchhuah a tumna lamah James Milner a pet per a, a let lehlam goal-ah a lut. Roma-in beiseina tak tak an neih hmain Liverpool bawk an inlar lehnghal a, Georginio Wijnaldum chuan minute 25-naah an goal hnihna a khung.

Inkhel pahnih belhkhawmah Liverpool-in 7-3 in hma an hruai a, chawlhlawk an hmang. Chawlhlawk hman a nih hnuah Edin Dzeko-a'n Reds keeper Loris Karius dan per a khung a, Roma an phur sawt. Hun tawp nan minute li a la awm tihin Radja Nainggolan chuan ṭha zetin a pet lut ve zui.

Hun pek belhah Liverpool substitute Ragnar Klavan-a'n handball vangin penalty a chawi a, Nainggolan bawkin a pet lut–mahse Roma tan si phurh sut zawhna hun a awm tawh lo. Hun a tawp a, final-a Real Madrid hmachhawn tur chu Liverpool an ni.