Alexander Zverev a chak hram

German rawlthar duhawm Alexander Zverev chuan nomawi a kawl lai humhim turin kawng dik a zawh a, chutih rualin Munich Open second round paltlang tur erawh chuan vanneihna a mamawh tel.

Nilaini zan inkhelah world number 3 Zverev hian world number 118 Yannick Hanfmann chu 6-7 (12/14), 6-4, 6-2 in a hneh hram. Kum 21 mi hian a match lehpekah chuan Davis Cup-a a teammate Jan-Lennard Struff a hmachhawn leh dawn a ni.

Inkhel dangah Chung Hyeon pawhin 6-1, 6-1 in khawtual tlangval Matthias Bachinger a hneh a, Australian Open semifinalist hi champion lai Zverev tana nomawi chawi nawn ti harsa tur zingah a tel phak ang.

Kum 21 mi Chung hian a service neih ṭhat a la chhawr ṭangkai zel a, a service hmasa aṭangin point thum chiah a paih. Hnehna chang tur hian darkar khat pawh a mamawh lo a, tun season chhunga vawi 19 a chakna chiah a ni–2014 Munich champion Martin Klizan nen an inkhel leh dawn a ni.