Mitchell hoin Jazz an chak

NBA Playoff-ah Utah Jazz-in nimin zing khan Houston Rockets chu 116-110 in an hneh let a, 1-1 in an inhnehtawk. May 5, Inrinni zing dar 8:00-ah game 3 an khel leh ang.

Western Conference semifinal game 2-ah Jazz-in ṭan phat aṭangin game nung tak an khel a, quarter hmasa berah point 36 zet an hmu nghal. Inkhela langsar lai erawh minute 6:11 a la awm tihah Donovan Mitchell-a'n lalutin a shot per leh chu a dunk nghal a, hei hi point ruka Jazz falna a ni bawk.

Kum 21 mi Mitchell hi NBA-a a vawi khat inlanna a ni a, game 2 inkhel pawimawh takah hian double-double neiin point 17 a luh bakah assists vawi 11 a nei a, Jazz chakna kawngah a pawimawh hle. Hetihlai hian Joe Ingles-a'n point 27 zet a nei a, Jazz forward hming lam hmaih a thiang lo.

Houston star James Harden chuan an zuam sual thu a sawi thung a, kum 28 mi American baller chuan, "Nung takin bul an ṭan a, lut turin shot an ngah a, amaherawhchu kan veng uluk tawk lo a ni. Second quarter tawp lam aṭangin han ṭan leh mah ila an ṭhat miau avangin thawhchhuah leh a harsa tawh a ni," tiin a sawi.

Tukin zing dar 3:30 khan Toronto Raptors leh Cleveland Cavaliers te an inkhel a, result kan hre hman lo. Naktuk zing dar 6:00-ah Boston Celtics leh Philadelphia 76ers an inkhel dawn a, Celtics hian 1-0 in hma an hruai mek.