Zanin dar 12:30-ah Premier League inkhel Brighton vs Manchester United
Manchester United-in FA Cup final-a Chelsea an hmachhawn hmain Premier League match thum khelh tur an la nei a, zanin dar 12:30-a Brighton & Hove Albion nen Premier League-a an inkhel tur hi inpuahchahna ṭha tak a ni thei ang.
Lukaku leh Romero
Manchester United-in Arsenal an hneh ṭumin inhliam vangin Romelu Lukaku chu lakchhuah a ni a, Belgian striker hi zanina inkhel turah a dinhmun a chiang lo.
United second keeper Sergio Romero dinhmun a chiang lo bawk a, amaherawhchu Argentine keeper aia ṭha David de Gea an la kawl avangin buaina tur a awm lo ang.
Seagulls-in Huddersfield nen an intawn ṭuma red card hmu Davy Propper an chhawr leh thei tawh dawn a, amaherawhchu Chris Hughton-a ngaihtuahna tibuaitu a ni thei bawk. Dutch midfielder Propper-a inhliam aia lut Beram Kayal a khel ṭha thei hle.
Fimkhur a ṭul
Man United hian tun hnaia inelna hrang hrang pasarih an hmachawn zinga parukah hnehna an chang vek a, league match hnuhnung pariatah point 21 an hlawh chhuak.
Jose Mourinho hote hian khualmuala match hnuhnung pathumah Bournemouth, Manchester City leh Crystal Palace te an hneh vek.
Amaherawhchu, United tan fimkhur a ngai, Mourinho hote hian Premier League-a kaithar pahnih Huddersfield (2-1) leh Newcastle United (1-0) te chu an hneh lo ve ve.
Hetihlai hian Seagulls hian an match hnuhnung pasarihah chak hmel an hmu lo a, league match hnuhnung pali zinga pathumah an inhnehtawk. Amex Stadium-ah erawh record aṭanga thlir chi an ni lo a, suppporter an neih ṭhat avangin club lian ho tan point hmuh awlsamna a ni lo.
Brighton hian Arsenal an hneh thei a, Tottenham nen an inhnehtawk bawk a, Manchester City, Chelsea leh Liverpool te erawh hneh lo mah se chetsual theihna a ni.
Inkhel nghawng
Manchester United-in Champions League an khel chiang tawh a, pahnihna nih an tum. Brighton erawh tla thei an ni a, United zawh hian Manchester City leh Liverpool te an la hmachhawn dawn avangin an chanchin hian ngaihven a la hlawh thei tlat.
Tun dinhmunah Brighton hian point 37 an hmu a, 14-naah an awm mekin relegation zone-a awm Southampton aiin point nga chauhin an hmu tam a, an khelh hmabak match thuma an chak loh vek a nih chuan an tla thei ang.
Seagulls hian an match hnuhnung berah Reds hi an hmachhawn dawn a, Jurgen Klopp-a hote hian Pathiannia Chelsea an nen lo a nih chuan season thara Champions League khel lo thei an la ni a. United leh City-in Brighton an hneh a nih chuan Liverpool tan Seagulls hmachhawn a har sawt dawn tihna a ni.