Inrintawkna ka la nei – Djokovic

Novak Djokovic chuan tun hma lama a ropuina ang nei let leh turin inrintawkna leh beiseina a la neih thu a sawi a, tun hnai thla 18 chhung chu buaina leh hasatna karah a inkhelh thu a sawi tel bawk.

World number 1 Djokovic hi January thla khan a kiu hliam zai a ni a, thla hnih hnu rawn kir lehin Indian Wells leh Miami Open-ah te a match hmasa berah a chak lo nghal.

Kum 30 mi Djokovic chuan, "Tennis khelh ka châkin ka lung a leng hman a, rawn kir tura thutlukna siamtu chu keimah ka ni. Mahse, beisei leh duhthusamin ka la dam si lo, ka tawrh phah ta a ni," tiin a sawi. A kiu a dam thu sawi fo mah se duhthusam chuan a lo la dam chiah lo tihna a ni.

Grand Slam vawi 12 champion tawh Djokovic hi tun dinhmunah world number 12 a ni mek a, tun hnaia tournament panga a khelh tawhah quarterfinal a thleng phak lo vek. Barcelona Open second round-ah world number 122 Martin Klizan a hneh lo a, Monte Carlo Masters third round-ah Dominic Thiem a ngam lo bawk.

Serbian tlangval chuan, "Inrintawkna ka nei reng ṭhin a, hei vang hian ka naupan laia ka duhthusam pawh ka ti hlawhtling thei ṭhin. Mahse, tunah erawh chuan hmana ka rilru ang kha a ni ber tawh lo a, ka beidawng tihna erawh a ni bik lo. Sawiselna ka dawng hnem a, hei hian min nghawng lem lo," tiin a sawi.