AFC Cup-ah Bengaluru FC an chak chiang
Bengaluru FC chuan AFC Cup-ah stage sang zawk thlen ngei tumin Nilai zan khan Aizawl FC 5-0 in an sawp. Amaherawhchu inkhel dangah New Radiant-in an mualah Dhaka Abahani 5-1 in an hneh a, Maldives club hi hmahruaitu an ni chhunzawm zel.
Bengaluru te hi Group E-ah an awm a, team pali zinga hmu sang ber hi 'inter zone playoff semifinal' khel turin an tling dawn a, tunah hian match khat chauh khelh tur a awm tawh. Mizo club Aizawl FC tan beisei tur a awm tawh lo a, Bengaluru FC leh New Raidant ten hmunruak pakhat hi an inchuh ang.
BFC an tlo
I League-ah an kham khawp an hmuh loh avangin Bengaluru FC chu Indian Super League-ah an zuanglut a, BFC hian ISL-a an inlan hmasak berah league round thununin pakhatna an ni. Amaherawhchu, Albert Roca hote hian final-ah Chennayin FC an hneh loh avangin season tluana an chet ṭhatna chuan nomawi a keng tel lo.
Nomawi duhin BFC-in Indian Super Cup pawh an la thutak zui a, ISL club tam zawkin an player pawimawh an chhawr loh laiin Blues hian an ṭhat dan bera inelna hmachhawnin nomawi an hlawh chhuak.
AFC Cup-ah pawh Bengaluru FC an danglam lo a, kum 2016 khan Asia rama inelna sang ber dawttuah hian final an lut tawh a, tun ṭumah pawh hian team ṭha zingah an tel phak.
5 star BFC
Bengaluru FC-in Guwahati-ah Aizawl FC 3-1 in an hneh tawh a, an mual Sree Kanteerava Stadium-ah an hneh chiang lehzual.
Nilai zan inkhelah hian BFC captain Sunil Chhetri chuan minute 16-na lekah a penalty hlawhchhuah chu goal-ah a chantir a, minute khat pawh a ral hmain Daniel Lucas Segovia-a'n khung belh lehnghalin Mizo club tan result ṭha beisei theih a ni tawh lo.
BFC tan Udanta Singh chuan minute 30-naah Udanta Singh chuan a khung belh a, Chhetri-a'n a harsa tur zawng zawng a thawhsak a, first half-ah 3-0 a ni. Second half-ah Spanish forward Segovia-a'n minute 62-naah a goal hnihna mawi zetin a tauh lut a, substitute Daniel Lalhlimpuia'n minute 89-naah goal ngana a khung a, captain Chhetri thawhrah bawk a ni.
Serchhip tlangval Daniel-a hian Aizawl FC an hmachhawn hmasak ṭum pawhin goal a khung tawh a, tun ṭumah hian Mizo keeper Lalthuammawia chuan inkhel bul ṭanin bench aṭangin Malsawmzuala chu a tlan lut bawk.
Hmabak
Group match hnuhnung ber hi May 16, zan dar 6:45-ah khelh a ni dawn. Bengaluru FC-in Bangladesh club Abahani Dhaka an lenchilh ang a, Aizawl FC-in Guwahati-ah Maldives club New Radiant an mikhual ve bawk ang.
New Radiant hian khualmualah Blues 1-0 in hneh lo mah se an mualah 2-0 a an hneh avangin point 12 hmu ve veah Indian Super Cup champion aiin an dinhmun a ṭha zawk. Hei vang hian BFC hian Aizawl FC puihna an mamawh dawn a, Mizo club hian Maldives club laka point an hlawh chhuak a nih loh chuan Bengaluru hi chak mah se knockout round an lut chuang lo ang.