Dam chhung atan badminton player hrem

Malaysian badminton player pahnih kum 31 mi Chun Seang leh Zulfadli Zulkiffli (25) te chu kum 15 leh 20 chhung atan hrem an ni a, badminton huangah an rawn let hman tawh dawn lo tihna a ni.

Kum 2013 aṭang khan player pahnihte hi eiruk thilah an inhnam­hnawih tih hmuhchhuah a ni a, Bad­minton World Federation (BWF) chuan infiamna a thianghlim zui theih nan dan bawhchhetute chungah zahngaihna a lantir lo. Inkhel thei lo tura a hrem bakah Tan leh Zulkiffli te hi Rs 9,97,074 leh Rs 16,61,821 chawi turin a ti bawk.

BWF hnuaiah Zulkiffli hi player beiseiawm tak a ni ṭhin, 2011 khan World Championship-ah junior champion a ni thei a. Mahse, kum 2013-2017 chhung khan match paliah dik lo takin thil a ti tih hmuhchhuah a nih bakah vawi 31 zet dan a bawhchhe bawk.

Malaysia tana a inlan duh loh vanga kum hnih hrem tawk tawh Tan pawhin hun rei vak lo chhung khian vawi 26 zet thil dik lo a ti tih hriat chhuah a ni bawk a, hre reng chunga thil sual an tih vangin hrem an tawk.

Malaysian player zingah world number 1 hlui Lee Chong Wei chu 2015 khan doping vangin thla riat chhung hrem a lo ni tawh bawk.