Ruah sur karah Delhi an chak

Indian Premier League table hnuai lam inkhelah Delhi Dare­devils chuan Nilaini zan khan Rajasthan Royals an hneh a, ruah surin a tihbuai inkhelah DLS method hmangin run liin an chak.

Delhi khawpuiah ruah a sur nasat avangin inkhel tih khawtlai a ngai a, over 20-a khelh tur chu over 18-ah tih hniam a ni. Mualneitu team Delhi an bat hmasa zawk a, opener Prithvi Shaw chuan run 47 ngawt a rawn vaw chhuak nghal.

Shaw nena ding dun Colin Munro chu run pawh siam loin out nghal mah se a hmunruaka rawn lut Shreyas Iyer a che ṭha a, Delhi captain hian ball 35 lekah run 50 a rawn vaw chhuak.

Run 69 siamtu Rishabh Pant a che ṭha lehzual a, ball 29 chiah a hmachhawn. Over 17.1 a nihin ruah sur bawkin inkhel a tibuai a, inkhel tihtawp a ni - Delhi hian run 196 an siam hman a, wicket ruk an hloh.

Ruah sur a ban hnuah Rajasthan Royals chu over 12 chhung bat tura tih an ni a, an target atana tuk sak chu run 151 a ni. Rajasthan tan D'Arcy Short (44 runs) leh Jos Buttler (67) te rawn che ṭha nghal mah se an ṭhianten an pui ṭha tawk lo.

RR-in over 12-ah run 146 an tlin thei hram a, wicket nga hlohin an tlawm.