Champions League khelh inchuh ; Chelsea khelmualah Liverpool an leng dawn

Liverpool-in Premier League match hnih chiah khelh tur an nei tawh a, season thara Champions League khel chiang tura an mamawh zat chu point thum a ni a. Reds hian Pathianni zan dar 9:00-ah Chelsea an lenchilh ang.

Blues hi Reds ang thoa Champions League khelh tum an ni a, Liverpool hmabak a awlsam dawn lo tih a chiang a, season hmasa Premier League champion lakah hian an tlawm a nih chuan match tawp berah Brighton & Hove Albion an hneh ngei a ṭul tawh ang. Hriat tel atana ṭha erawh hei hi a ni–Stamford Bridge-a league match an khelh hnuhnung pahnihah Liverpool an chak ve ve.

Zanin dar 7:30-ah Tottenham Hotspur an inlan ve dawn bawk a, tlak hlau West Brom nen an inkhel ang. Spurs pawh hi Champions League khelh tum ve tho an ni a, pathumna Liverpool chu match khata khel tlem zawk chungin point khatin an phak lo mek.

Dinhmun danglam
May 27 a thlen meuh chuan Liverpool dinhmun a chiang dawn–team ropui tia fak an hlawh thei a, engmah lo maia 'chhuah' an ni thei bawk. Reds hi 'Champions League champion' leh 'Champions League khel lo thei' inkarah an awm.

Liverpool hian Premier League kaltlangin Champions League an khel lo a nih pawhin Europe-a club inelna sang berah an champion chuan Champions League an khel dawn tho a, a tawi zawnga sawi chuan Chelsea aiin an hlauthawng lo zawk ang.

Chelsea hian table-ah pangana dinhmun an luah mek a, match thum khelh tur an la neihah palina Tottenham chu point liin an phak lo mek–Blues tan CL khel tur chuan Liverpool hneh a ṭul a, Reds leh Spurs an chet chhiat chhunzawm a ṭul bawk.

Conte dinhmun
Antonio Conte-a'n season ṭan dawnah Jose Mourinho dinhmun anga din a duh loh thu a sawi a, Portuguese manager a kap–Mourinho hian 2014-15 season Premier League-ah Chelsea a champion pui a, 2015-16 season-ah a chet chhiat avangin ban zui a ni.

Conte-a'n a duh loh ang dinhmun a tawng mek–Chelsea a champion pui hnu lawkah ban theih dinhmunah a ding mek a, Mourinho dinhmun a lo sawi tawh anga ding lo tur chuan Champions League khelh a, FA Cup final-ah Manchester United a hneh bawk a ṭul ang.

Chelsea hi inelna hrang hrangah match li chhung chu a zawnin an chak tawh a, tun hnai result chhut chuan Liverpool hi an match hnuhnung pali a vawi khat chiah chak an ni thung–mah se Champions League final lut hlim an ni a, Reds 'phur' vanglai mikhual hi thil châkawm a ni lo.

Hmana an duh loh kha...
PFA Player of the Year leh FWA Player of the Year-a thlan hlim Mohamed Salah chu hmana amah duh lotute khelmualah a kir dawn a, Chelsea hi 2016-a amah hralhtute kha an ni.

January 2014 khan Salah hian pound maktaduai 16-in Chelsea hi Basel aṭangin a pan a, inelna hrang hrangah match 19 khelin goal hnih chiah a khung sak thei. Premier League-a a season hnihnaah loan-in Fiorentina pan tir a ni a, 2015-16-ah Roma chu loan bawkin a zawm.

Season hmasa ṭan dawn khan Roma chu a nghetin a zawm a, nipui transfer a nih meuh chuan Reds-in pound maktaduai 34-in an lei–tunah chuan Premier League player 'hot' ber pawl a ni tawh a, Salah hralh chungchangah Mourinho leh Chelsea an inpuhmawh mek!

Egyptian forward hian amah hnawl tawhtu lakah goal khung ngei a tum ang a, goal a khung chuan Premier League season khata match 38 chauh a awm hnua goal 32 khung tling hmasa ber a ni ang.

Hmabak hautak Spurs
Premier League table mawngphahah West Brom an awm mek a, mah se tuna an dinhmun hi Baggies ṭhatna tehna atan erawh a tlak lo–league a an match hnuhnung paliah vawi hnih chakin vawi hnih an khingpui an inhnehtawkpui.

Baggies hian Manchester United chu Old Trafford-ah 1-0 in an hneh thei a, Liverpool chu 2-2 in an inhnehtawkpui thei bawk. Tlak hlaua khel an nih tawh miau avangin club lian lakah pawh an zam lo a, United hnehtu team hi Spurs hneh turin an ṭha tawk.

Hriat tel atana ṭha erawh Baggies hian hnehna an chang a nih pawhin Swansea City-in zanin dar 7:30-ah vek Bournemouth an hneh chuan an relegate ang a, Swans an chak loh pawhin Southampton-in zanin dar 10:00-a Everton an hneh chuan an relegate tho bawk ang.

Match thum khelh tur la nei Spurs hian Baggies lakah hnehna an chang lo a nih chuan Chelsea an phur sawt ang a, Blues hian thatho takin Liverpool an mikhual theih phah ang–hei zawng zawng ngaihtuah chungin Tottenham an khel ang.