Manchester City record siam zan?

Pep Guardiola nauten Premier League champion an nih chian tawh hnuah an la duhtawk mai lo a, goal khung hnem leh point hmu tan record siam tumin hmalam an pan zel. Pathianni zan dar 6:00-ah Huddersfield Town an mikhual dawn a, nomawi chawi chunga record siam an tum ang.

Jose Mourinho kaihhruaina hnuaiah Chelsea chuan 2004-05 khan point 95 an hmu a, Carlo Ancelotti-a'n a enkawl hnuah Blues hian goal 103 an khung tawh bawk - London club sulhnu hi Premier League record ding lai a ni.

Tun dinhmunah Pep-a nauten match 35 aṭangin point 93 an nei tawh a, goal 102 an khung tawh bawk - zaninah hian goal khat aia tama an chak a nih chuan Chelsea record ding lai pahnih hi an khum nghal dawn a, point 100 hmu tling tur erawh chuan an match hmabak dang pahnihah hnehna an chan a la ngai bawk.

City tan an match hnuhnung bera inlan lo David Silva chu khel thei tura ngaih a ni. Spain international hi kar hmasa khan chawlh pek a ni. Kum 32 mi Silva hi a hun hmaa piang a fa ngaihvenin an ramah a haw fo a, hei vang hian tun season-ah match ṭhenkhat a khel lo.

West Ham an hneh ṭuma malpui hliam tenau nei Kyle Walker dinhmun a chiang lo thung. Mahse, England international defender hian Ningani khan Silva nen team training an zawm thei a, record thar siam an tum miau avangin Pep-a'n inhamtang tura la him chiang lo Huddersfield lakah a player neih ṭhat a chhawp chhuak ang.