NBA Academy-ah Mizo naupang

Zarkawt rawlthar Lalhnehpuia Chhakchhuak (Naua) chu NBA Academy-a awm tura thlan a ni a, Mizoram basketball tan mellung thar pawimawh tak a ni.

ACG Cares Foundation leh NBA ṭangkawp chuan NBA Academy-a awm tur basketball-a theihna nei sang bik India ram hmun hrang hrangah an zawng a. May 2-4 inkar khan Jaypee Atlantis Integrated Sports Complex, Greater Noida-ah thlan bik 50 te inel lehin mi pariat an thlang chhuak a. Los Angeles Lakers center Brook Lopez pawhin a telpui a ni.

MSL4 khelh zawh taka Mission Vengthlang Hollows player Naua hi thlanchhuah zingah a tel a, heng player-te hian full scholarship an dawng dawn a. Coach ṭha hnuaiah training an nei ang a, basketball zirna bakah zirna senso thlengin a thlawn vek a ni ang.

Senior director of basketball development operations, NBA India Scott Fleming chuan, "Hnehpuia hi Mizorama Skills Challenge kan rawn neih ṭum khan a theihna san zia ka hmu a, amahah hian beiseina sang tak kan neih avangin kan thlang a ni. Tuna player thlan pariat hian NBA Academy-a awm tawh sa te an zawm ang a, 24 an ni chiah ang," tiin Vanglaini a hrilh.

March thla khan Hawla Indoor Stadium-ah Junior NBA Skills Challenge neih a ni a, naupang 388-in hming an pe lut a, hemi

ṭuma thlanchhuah zingah pawh hian Naua hi a tel a, Fleming-a'n Vanglaini a hrilh danin North East aṭanga thlanchhuah awmchhun a ni.

India coach hlui Fleming chuan, "Skills Challenge leh tuna mi hi thil inang lo a ni a, tuna mi hi a sang zawk chu a ni. Coach ṭha hnuaiah training an nei ang a; America, Australia leh Europe-a te an zin chhuak ang," tiin thil awm dan a sawifiah.

NBA Academy-a awm tur Naua hi India Junior Championship-ah Mizoram team-a awm lai a ni a, Delhi aṭang hian inelna neihna tur hmun Ludhiana, Punjab a pan nghal ang. Mizoram khelh hun tur hi a la hriat loh a, May 7 hian inelna hi an ṭan ang.