El Clasico ; Real tan hming chher a pawimawh
La Liga tihlutu El Clasico chu Pathianni zan dar 12:15 hian Barcelona leh Real Madrid ten Nou Camp-ah an khel dawn. Catalan club-in match 34 an khelh tawhah point 86 an hmu a, Europa League finalist Atletico Madrid (86 pts) leh Champions League finalist Los Blancos (75 pts) te tan umphak theih a ni tawh lo.
Champion chiang tawh mah se El Clasico boruak erawh hmeh daih mai theih a ni lo a, Real Madrid tan tun hi hming chherna hun ṭha a ni.
Fak phu Real
Real Madrid hian Champions League final an thleng chungin 'vannei' tia sawi a tam a, an phu tawk fakna an dawng lo.
Los Blancos hi UCL-ah Borussia Dortmund leh Tottenham Hotspur te nen awmin last 16 an lut a, French champion Paris Saint-Germain an hneh. Quarterfinal-ah Italian champion Juventus hneh lehin semifinal-ah German champion Bayern Munich an hneh leh bawk.
Real-in an hneh club pathum te hi an ram league thununtu vek an ni a, Champions League final kalkawng thlirin Real hian fak an phu.
Hmabak Barca
Real hian fakna an dawng duh a nih chuan Nou Camp-ah an theihna an pholan a ṭul a, Florentino Perez leh board member dangte pawhin Catalan club nena an inkhel tur hi club hmel lan theihna a nih avangin an ngai pawimawh dawn.
Bayern Munich an hneh ṭumin Real player pawimawh Raphael Varane, Marco Asensio leh Luka Modric te an chau tih a lang a, Zinedine Zidane-a'n Liverpool thlir chungin hahdamna hun ṭha a pe thei a. Hetihlai hian player pawimawh dang Dani Carvajal leh Isco te chu Barca hmachhawn turin an rawn let thei thung.
A seh hmeh
La Liga top scorer-in an dawn ṭhin Pichichi award dawng turin Lionel Messi dinhmun a ṭha ber a, goal 32 khung tawhin Cristiano Ronaldo (24) leh Luis Suarez (23) ten an pha lo hle. Pathianni zan inkhel a zawh chuan top scorer tur chu a chiang tawh ang.
Cristiano Ronaldo-a'n Bayern Munich nen ṭum hnih an inkhelhah goal a khung lo ve ve a, Liverpool nen an inkhelh hmaa inrintawkna nei turin goal khung a mamawh.
Barcelona hian tun season-ah league bikah hneh loh an la tawng lo a, Catalan club dang thei tur an awm a nih chuan Real aia thlanawm an awm chuang lo.
Catalan club hian 2014-15 season-a Luis Enrique hoa Nou Camp-a Real an hneh hnuah an mualah an la chak leh lo a, an record duhawm lo hi siam ṭhat an duh ang.