Kolkata Knight Riders-in hma an sawn zel
Kolkata Knight Riders-in IPL-ah hma an sawn ve zel a, Ningani zan khan Chennai Super Kings chu wicket rukin an hneh.
CSK tan MS Dhoni bawk chu player langsar a ni a, India captain hlui hian run 43 vaw chhuakin a tawp thleng a dam. Dhoni bakah hian Shane Watson (36), Faf du Plessis (27) leh Suresh Raina (31) te chu che ṭha tia sawi tur ni lo mah se pangngai takin an bat.
Chennai club-in over 20-ah run 177 an siam a, wicket nga an hloh - target pangngai tak a ni.
Kolkata bat hun a thleng a, top three bastman zingah Sunil Narine (32) tih loh Chris Lynn (12) leh Robin Uthappa (6) te che chhe viau mah se Chennai hlim chhung a rei lo.
Shubman Gill chuan ball 36 lekah run 57 vaw chhuakin a tawp thleng a rawn dam a, Dinesh Karthik chuan out loa run 45 siamin a rawn che ṭha viau bawk - batsman pahnih chet ṭhat zarah KKR-in over 17.4 lekah an target an umpha a, wicket li hlohin an chak.