Arsene leh Arsenal veltu Atletico

Arsene Wenger-a'n nomawi nen a hmangaih Arsenal a thlah thei dawn ta lo. Wenger-a nau ten Europa League final khelhna tur Stade de Lyon pan an tumna kawngah Atletico Madrid an paltlang zo lo a, Spanish club lakah hian aggregate-ah 2-1 a tlawmin an zinkawng a tawp.

Ningani zan semifinal inkhel dangah Marseille chuan inkhel pahnih belhkhawmah Red Bull Salzburg chu 3-2 in an hneh ve bawk a, French Ligue 1 club leh vawi hnih champion tawh Diego Simeone nau ten May 17-ah nomawi an inchuh dawn a ni.

Beiseina thamral
Wanda Metropolitano-a inkhelah Diego Costa-a'n chawlhlawk hma chiahin goal awmchhun a khung a, goal dang a luh zui loh avangin final thlen nan a tawk–team pahnihte hi kar hmasa khan Emirates Stadium-ah 1-1 in an lo inhnehtawk tawh bawk a ni.

Hliam vanga first leg khel lo Costa-a'n inkhel bul a ṭan tawh a, Spain inter-national hian minute 10 pawh a liam hmain Arsenal tlarhnung a su hawng nghal. Laurent Koscielny leh Nacho Monreal a paltlang hnuah keeper David Ospina chauh a hmachhawn tawhah a pet out hlauh.

Arsenal captain Kosciel-ny chu kheimit hliam vangin zawn chhuah a ngai zui a, France international hi World Cup-ah a inlan theih a beiseiawm loh. A thlak turin Calum Chambers dahluh niin, English defender leh a dinpui Shkodran Mustafi ten Antoine Griezmann an veng hneh lo.

France international forward Griezmann hian chawlhlawk hma chiahin Costa tan ball duhthusam a pe a, Chelsea striker thar hian a hun ṭha neih a khawhral satliah tawh lo; chiang zetin a hlap lut–amah vengtu Hector Bellerin chuan harsatna siamsak turin tharum a ngah tawk lo a, tun hma lama a chet ranna leh tlan chakna ang kha a chhawr lo bawk.

Chak lo Arsenal-in a zawnin Champions League an khel phak dawn lo tih a chiang nghal a, season tawp ruala chhuak tur Wenger-a'n nomawi nen a hun tawp hman tum mah se an beiseina a thamral. Gunners hian rilru fimin an ngaihtuah nawn ngei ang a, first leg-a player 10 an hmachhawn chunga goal an khung tam lo kha pawi an la ti khawp ang.

Nomawi a hnai
Atletico Madrid hian 2009-10 leh 2011-12 khan Europa League nomawi an chawi a, a zawna vawi thum champion thei Sevilla hnungzuiin a vawi thum nan final an lut. Diego Simeone-a'n a enkawl chinah erawh tun hnai kum nga chhunga European football final vawi thum an khelhna tur a ni thung.

Season tir kha chuan Atletico hi Champions League-ah an inlan a, group stage an paltlang zo lo. 2013-14 leh 2015-16 UCL final-a chak lo Simone hian "Champions League final-a chak loh ai chuan Europa League champion nih ka duh zawk," tiin a sawi a, a thu sawi thlen dik tir turin match khat bak hmabak an nei tawh lo.

First leg-a hnawhchhuah Simone-a'n khelmual sir aṭangin a naute ho thei lo mah se ruahmanna fel tak a nei tih a chiang. Tharum ngah Costa leh Griezmann-a thiamna leh finna hmangin counter attack aṭangin Gunners an chhaih buai thei reng a, tlarhnungah Diego Godin leh a dinpuite an khawng tawk–goalkeeper Jan Oblak pawh rintlak a ni.

Kum 48 mi Simeone chuan, "Tunah chuan final kan lut ta, hna erawh kan la zo lo. Tlarhnung phui ṭha kha a lawmawm a, chutihrualin a hma lama kan player-te hnathawh kha a ropui takzet. Metropolitano-ah thawnthu kan ziak ṭan mek a ni a, fans lam puihna zarah chanchin ngaihnawm leh hlimawm kan ziah theih ngei pawh ka beisei," a ti.

Spanish club Atletico hian an khelmual thar hi an hmangthiam hle. Inelna hrang hrangah a zawnin match 11 chhung goal an chhuah lo tawh a, Gunners lakah an venhim zui bawk avangin an record an ziah belh. Simone-a'n 2011 aṭanga a enkawl hnuah vawi 198 zet clean sheets an nei tawh.