European league ten FIFA ruahmanna an duh lo

Europe-a league langsar leh lian zual te chuan FIFA-in Nations League kalpuia, Club World Cup tih len an tum bawkna chu an duh lo.

Club World Cup neih mek hi December apiangin team pasarih inelna atan neih ṭhin a ni a, FIFA chuan kum li dana neiha team 24 telna tura ruahman an duh a, Europe aṭangin team 12 an tel ang.

FIFA chuan UEFA leh CONCACAF (North America, Central America and the Caribbean) ten kalpui tura ruahmanna an neih tawh Nations League chu kalpui ve an tum bawk.

FIFA president Gianni Infantino chuan he an ruahmanna chungchangah hian sum thawh huam an neih tawh thu pawh a sawi bawk a, mahse hei hi ram 32 league intelkhawm European League chuan an thlawp lo.

Premier League, La Liga leh Bundesliga te pawh an telna European League president Lars-Christer Olsson chuan, "Kum 12 chhung atana ruahmanna neih lawk ni se, engmah thuchiang awm bawk si lo a ni a, kan tan chuan thil awmze nei lo mai a ni," tiin FIFA ruahmanna hi na takin a sawisel.