Cavs leh Celtic an chak

LeBron James hmangin Cleveland Cavaliers chuan 128-110 in nimin zing khan Toronto Raptors an hneh a, 2-0 in hma an hruai. Inkhel dangah Boston Celtics-in 108-103 a Philadelphia 76ers hneh hramin 2-0 thoin hma an hruai ve bawk.

Inrinni zan dar 2:30-ah Celtics leh Sixers ten game 3 an khel ang a, Pathianni zing dar 6:00-ah Cavs leh Raptors te hi an inhmachhawn leh bawk ang. Tukin zing dar 5:30 hian New Orleans Pelicans leh Golden State Warriors te an inkhel ang a, Golden State hian 2-0 in hma an hruai mek. Dar 8:00-ah Utah Jazz leh Houston Rockets an inkhel ang a, anni pahnih hi 1-1 in an inhnehtawk thung.

Chakpui tham James
Regular season an hman dan aṭanga thlir chuan Raptors chu team ṭha zawk tura ngaih an ni a, amaherawhchu Cavs-in LeBron James an neih miau avangin playoff-ah an chungnung zawk.

Game 2-ah an inel tawk a, halftime-ah Raptors chuan 63-61 in hma an hruai a, an intluk tawk hle. Third quarter-ah Cavs an che ṭha lawr a, 37-24 lawih a nih avangin Toronto tan thawhchhuah a harsa tawh a, hun tawp thlengin LeBron-a telna an chungnung a, 128-110 in hnehna an chang.

LeBron hian point 43 lawih an nei pha a, assists vawi 14 a nei bawk. Kevin Love-a'n an thiampuipa hi a thlawp ṭha a, point 31 neiin rebounds 11 a la ve bawk.

Inlehthalna
TD Garden-ah first half tawp nan minute nga chuang awrh khelh tur a la awm tihin Philadelphia 76ers-in point 21 in hma an la hruai a, chak tur a chiang taha ngaih ni mah se Boston Celtics-in a tawp thlengin an bei let a, 108-103 in an lehthal.

Celtic player Jaylen Brown chuan, "Khatiang ang boruak kha TD Garden-ah ka la tawng ngai lo a, mipui kha kan hnungah an ding tlat a, he inkhel hi ka theihngilh theih ka ring tawh lo," tiin inkhel chhinchhiahtlak a nih thu a sawi.