England: Southgate-a'n Chilwell & Abraham a ko

International break a ni a, club football hawisanin football ngainatuten ram leh ram inkhel lam an hawi leh ta - ngaihven hlawh England-in squad aṭangin thawm an nei na lehnghal.

England boss Gareth Southgate-a'n a tira a koh loh Chelsea defender Ben Chilwell leh Roma striker Tammy Abraham te squad-ah a ko a, a tira koh zinga mi Reece James erawh hliam vangin England squad-ah a awm thei dawn lo.

Three Lions hian tun international break-ah match hnih an khel dawn a, an match khelh tur hi World Cup qualifier ve ve a ni a, game harsa a awm lo tura ngaih a ni.

England hian October 9 zanah Andorra an lenchilh ang a, October 12 zanah Hungary an mikhual ve leh bawk ang - Three Lions hi World Cup qualifier match ruk an khelh tawhah an la tlawm lo a, point 16 hmuin group I-ah hma an hruai mek.

I dawn chiang lo
Southgate-a'n England squad-ah Reece James a ko tel zet a, mahse, Chelsea defender hi a inhliam avangin Three Lions tan international break-ah a feh chhuak thei dawn lo.

Chelsea boss Thomas Tuchel chuan England tana James koh a nih khan mak a tih thu a sawi a, fiamthuin, "England squad-a an koh thu ka hriat khan water polo team atan an ko emaw ka ti, a chhan chu pool-ah training a neih mek vang a ni," a ti!

German coach Tuchel hian a player chu England squad zawm tura a kal loh tur thu a sawi bawk a, a hliam tihdam tuma pool lamah training a kalpui mek avangin ram tana kohna chhang chi pawh a ni lo.

Hei hi England coach Southgate-a tan chuan zahna tham a tling - squad-a koh tur a player-te dinhmun a hrechiang lo tihna a ni a, James hi Manchester City-in 1-0 a Chelsea an hneh ṭuma inhliam a ni.

Abraham a lo kir
Euro 2020 squad-a lang pha lo Tammy Abraham-a'n Serie A lam a pan hnuah a theihna a pholang leh tawh a, Southgate pawhin hei hi hre rengin World Cup qualifier khel turin AS Roma striker hi a ko.

Kum 24 mi Abraham hian nipui transfer-ah khan a khelh phak lohna Chelsea chhuahsanin AS Roma chu pound maktaduai 34-in a zawm a, kum nga chhung atan Italian club-ah hian contract a ziak.

Season hmasaa Chelsea tan match 32-a khelha goal 12 khungtu hian tun season-ah Roma tan match 10 khelin goal li a khung tawh a, assist vawi thum a nei bawk, bar vawi ruk ngawt a tih per bawk - vannei deuh se la chuan a statistics hi a turu khawp ang.

Abraham hian England tan vawi ruk inlanah goal khat a khung tawh a, a goal khung hi November 2019-a Montenegro 7-0 a an sawp ṭuma a khung a ni a, ram tana a match hnuhnung ber hi November 2020 khan Iceland lakah a khel.

Si ban nghaktu
Southgate-a'n England tana goal veng turin Everton keeper Jordan Pickford, West Brom keeper Sam Johnstone leh Arsenal keeper Aaron Ramsdale a ko a, tun hnaia ngaihven hlawh thar Ramsdale hi England senior team tana a match hmasa ber a khel thei ang em, tih chu zawhna awm a ni.

Ramsdale hian season hmasa khan Sheffield United tan khelin Championship lamah a tlakpui a, mahse, nipui transfer-ah Gunners chuan Emirates Stadium-ah an thlem lut - match nga a khelh tawhah vawi li goal chhuah lohna match a nei!

Southgate-a duh ber chu Jordan Pickford a ni tih a chiang a, mahse, Everton keeper hi Premier League lamah top class keeper a nih loh chhan hmuh turin a awm fo a, fans lamin an duhkhawp lo.

Fans lungawina thlen turin club lian zawka first choice ni thei, German keeper ṭha Bernd Leno nekchhuak theitu Ramsdale hi a chhawr mai thei - fans lamin enchhin an châk.

Tel leh tel lo!
Southgate-an season duhawm tak hmangtu Borussia Dortmund midfielder Jude Bellingham leh Manchester United forward Mason Greenwood te a ko tel lo a, player pahnih a koh loh chhan erawh chawlh hahdamna hun a pek vang a ni thung.

England tan defender ṭha pahnih Harry Maguire leh Trent-Alexander Arnold chu hliam vangin squad-ah telh an ni lo a, tlarhnung lama an player neih dan thlirin Three Lions tan buai viauna tur ni erawhin a lang lo.

AC Milan centre back Fikayo Tomori-a'n Chelsea chhuahsana a khelh phakna club a zawm fuhzia a lang zel a, nipui transfer-a season hmasaa loan hmanga a khelhna Milan a ngheta zawmtu hi squad-ah telh a ni.

Euro 2020-a a tel phak loh hnua a vawi khat nan Aston Villa striker Ollie Watkins pawh koh a ni a, hetihrual hian tlarhmaah chuan season hmang ṭha lo chunga koh, Tottenham Hotspur striker Harry Kane leh Manchester United forward Jadon Sancho te hi mipui mit fukna tur an ni ang.

England squad
Goalkeepers: Sam Johnstone (West Brom), Jordan Pickford (Everton), Aaron Ramsdale (Arsenal)

Defenders: Conor Coady (Wolves), Ben Chilwell(Chelsea), Tyrone Mings (Aston Villa), Luke Shaw (Manchester United), John Stones (Manchester City), Fikayo Tomori (AC Milan), Kieran Trippier (Atletico Madrid), Kyle Walker (Manchester City)

Midfielders: Phil Foden (Manchester City), Jordan Henderson (Liverpool), Jesse Lingard (Manchester United), Mason Mount (Chelsea), Kalvin Phillips (Leeds), Declan Rice (West Ham)

Forwards: Jack Grealish (Manchester City), Harry Kane (Tottenham), Bukayo Saka (Arsenal), Jadon Sancho (Manchester United), Raheem Sterling (Manchester City), Ollie Watkins (Aston Villa), Tammy Abraham (AS Roma)