Mizoram aiawhin Chanmari Zothan

All India Football Federation chuan November 5-13, 2021 chhung hian Hero Futsal Club Championship 2021-22 a buatsaih dawn a, club 16 an tel dawn. Mizoram aṭangin Chanmari Zothan Futsal Club an tel ang, anni hi MFA hnuaia Futsal League season hnih awm tawhah an champion ve ve a ni.

India ram pum huap FIFA hriatpui futsal club inelna lian hmasa ber hi Shillong-ah khelh a ni dawn. Inelnaah hian club 16 an tel dawn a, group paliah pali zelin an awm ang a, group tin hi vawi khat ṭheuh an inkhelh chhuah hnuah a sang berin semifinal an lut ang.

Chanmari Zothan coach Samuel Lalrinzuala Sailo chuan, "Futsal World Cup a zo chiah a, World Cup awm leh hun tur chu kum 2024 a ni. Hemi hun atan hian India-in hma a la ṭan a, Mizo player an telh ve theih nan kan inpuahchah. Training ka nei ṭha a, Hero Futsal Club Championship-a nomawi chawi hmasa ber ni tur hian theihtawp kan chhuah a ni," tiin Vanglaini a hrilh.

Futsal Club Championship-a pakhatna hian Rs 3,00,000 an dawng dawn a, pahnihnain Rs 2,00,000 an dawng ang. AIFF-in zin vei vahna atan club tin hi Rs 1,00,000 a pe ang.

Club tin hi November 2-ah Shillong-a thlen tawh tur a ni a, zin hmain October 27-31 inkarah RT-PCR hmanga test vek tur a ni. Group stage khelh lai hian ṭum hnih November 2 leh 7-ah test an ni ang a, knockout stage lutte hi November 10-ah test an ni leh bawk ang. AIFF chuan inlena hmachhawn turte hi Covid-19 vaccine la vek turin an ngen a ni.