SAFF Championship hmahruaitu Nepal

Player 10-a khel Bang-ladesh nen inhnehtawka India an mualpho hnu lawkin Nepal erawh an chak a, Sri Lanka chu 3-2 a hnehin table chung ber an luah.

Nepal tan forward Suman Lama leh Anjan Bista ten minute 51 chhunga goal khat ve ve khungin an team hi 2-0 in hma an hruaipui a, awlsam takin an chak dawn niin a lang hman.

Mahse, Sri Lanka tan Marvin Hamilton chuan si phurh hi a rawn sut ṭhen a, kum 32 mi Hamilton hi League One club Gillingham FC youth system chhuak a ni a, non-league club Whitehawk FC tan a khel mek.

Sri Lanka phur lutuk tur beng daih nan Ayush Ghalan chuan Nepal tan goal khat a rawn khung ve leh a, Sri Lanka hian hun pek belha Dillon De Silva penalty hmangin goal khat khung ve leh mah se si phurh sut zo turin hunin a daih tawh lo.

Kum 19 mi De Silva hi Queens Park Rangers Under 23 tan a khel mek a, Tottenham Hotspur academy aṭanga inzir chhuak player hian hmabak a nei êng hle.

SAFF Championship hi vawiin an chawl dawn a, inkhel a awm dawn lo - naktuk tlai dar 4:30-ah Sri Lanka hi India nen an inkhel leh dawn.