Thiem banrek zai a ngai dawn lo

Hliam vangin Dimonic Thiem tan tennis season kal lai a tawp tawh a, mahse a banrek hliam zai tura ngaih chu zai a ngai dawn lo hlauh a, season thar tir lamah chuan dam taka a inlan theih nghal a beisei awm.

Kum 28 mi Thiem hi June thla a khelh Mallorca Open-ah khan a inhliam, a hliam vang hian Wimbledon a khelh theih loh bakah nomawi a kawl mekna US Open-ah pawh a inlan thei lo hial.

Austrian star Thiem chuan, "Belgium-ah ka hliam dinhmun endik turin ka kal a, vanneih thlak takin zai a lo ngai dawn lo. Ka banrek hi tunah chuan a dam chho ve leh mek a, kar leh aṭang chuan nasa zawkin ka hman theih tawh pawh ka beisei.

"Hun rei tak chhung racquet hmang loa awm chu a khawhar thlak takzet," tiin a sawi a, zai a ngaih dawn loh avangin a dam leh nghal tihna erawh a ni lo a, pangngai taka inkhel leh tur chuan a nghah rih a ngai dawn.

Thiem hian season hmasa khan US Open final-ah Alexander Zverev a hneh a, player ropui Roger Federer, Rafael Nadal leh Novak Djokovic te kara Grand Slam chawi thei tlemte zinga pakhat a ni.

Mahse, tun season erawh a tan hun ṭha lo a ni. Madrid Open-ah khan semifinal a lut a, a bak chu thlen sanna pawh a nei lo - hliamin a tih buai bakah a inkhelh theih chhunah pawh a khel chhuak ṭha tawk lo.