Wilder hi 'atomic bomb' ang a ni - Fury

Inrinni zan, keini lam sanaa Pathianni zingah Deontay Wilder leh Tyson Fury te a vawi thum nan an inhnek dawn a, British boxer Fury chuan a khingpui tur Wilder chu 'atomic bomb' tiin a fak.

Kum 33 mi Fury chuan, "Mi tam takin Wilder hi chak lo tur angah an ngai nghal ngawt a, boxer satliah ang maiin an en a ni. Mahse, Wilder hi chutiang maia thai bo chi a ni lo," a ti.

Boxer pahnih hi T-Mobile Arena, Paradise, Nevada, US-ah an inhnek dawn a, WBC heavyweight title an inchuh dawn - hetihlai hian Anthony Joshua-a'n rin loh taka Oleksandr Usyk a lo ngam loh avangin he inhneka chak zawkin an hmachhawn leh tur hi rinthiam a har hle.

Fury leh Joshua hi a tirah inhnek tura tih ni mah se court thupek angin Fury-a'n Wilder lam a hawi a, hei vang hian Joshua pawh Usyk hnek tura tih a ni. Joshua a tlawm a, mahse, Usyk nen an inhnek nawn dawn - Fury a chak a, Joshua-a'n a title a nei let thei bawk a nih chuan an inhnek theihna chance a la awm.

A vawi thumna
December 2018 khan Fury hi Wilder nen a vawi khat nan an inhnek a, WBC heavyweight title inchuha boxer ropui pahnih inhnek hi chak zawk awm loa puan an ni - boxing fans an lungawi lo.

Wilder nen an inhnehtawk hnuah Fury hian Tom Schwarz leh Otto Wallin te chu a hneh zui a, hetihlai hian Wilder-a'n Dominic Breazeale leh Luis Ortiz a lo hneh ve bawk.

February 2020-ah a vawi hnih nan boxer pahnih an intawng leh a, Fury-a'n round sarihnaah technical knockout hmanga hnehna changin WBC heavyweight title a hlawh chhuak.

Wilder a lungawi thei lo. Fury hneh let theih a inbeisei a, British boxer-in Joshua hnek tuma ruahmanna a kalpui hnuah pawh court hmangin a umzui a, a vawi thum nan an inhnek leh dawn ta.

Atomic bomb
Fury-a'n vawi 31 fight a hmachhawn tawhah tlawm a la nei lo a, Wilder hi vawi 44-ah vawi khat a tlawm tawh thung - a tlawmna awmchhun hi Fury a ni a, phuba lak ngei a duh.

Kum 33 mi Fury chuan, "Deontay Wilder hi heavyweight boxer hlauhawm ber a ni. Boxer dang ho en ula, Wilder anga hlauhawm in hmu lo ang. Chutiang taka boxer ṭha chu ka hmachhawn dawn a, atomic bomb ka hmachhawn dawn.

"Bomb ṭhiat tura wire leh thil dang tih chah kan tum ang mai hi a ni dawn a, Wilder hmachhawn chu chutianga hlauhawm chu a ni. Tun hi ring chhunga kan intawn vawi thumna tur a ni a, kan intawn apiangin a hlauhawm em em zel," a ti.

Wilder hian a hnek nat chu a larpui a ni a, vawi 44 fight a hmachhawnah vawi 42 a chak a, vawi khat draw-in vawi khat a tlawm a, heng zinga vawi 41-ah hian a khingpuite a knockout vek - mahse, a draw leh tlawmna hi Fury ve ve a ni thung!

Klitschko dawttu
Fury chuan, "Wladimir Klitschko dawtah chuan Wilder hi ka boxer hmachhawn tawha hlauhawm ber a ni. Klitschko ka hneh hnua ka tana hna hautak tur chu Wilder tih hi ka hre sa," a ti a, American boxer a fak nasa hle.

British boxer chuan sawi zawmin, "Klitschko tluktu kha chu an awm lo a, a dawta hlauhawm chu Wilder a ni. Boxer zingah min el phak tur in ngaihtuah chuan Wilder hi a ni mai a, tuna boxer zingah chuan a hlauhawm ber.

"Boxer dang zawng hi chu ka tan harsa lutuk an awm lo. An hlauhawm lo a, boxer naran ve mai an ni," a ti a, Anthony Joshua tan hriat a nuam lo ang.

WBC heavyweight champion hian vawi 31 fight a hmachhawn tawhah a khingpuite vawi 30 a hneh a, vawi khat draw result a nei - heng zinga vawi 21-ah hian a khingpui a knockout.