Solskjaer enkawl Man United hmabak hi...

Manchester United-in Premier League match sarih khelh zawhah point 14 an hmu a, table-ah palinaah an awm. Ole Gunnar Solskjaer-a hote hi pakhatna Chelsea nen an inkarah point hnih chauh a awm a, dinhmun chhia tih tur a ni lo.

Chutihrualin point hmuh dan chauh ni lo a, khelmuala an khelh dan aṭanga teh chuan Man United hi Chelsea, Liverpool leh Manchester City te nen an inthlauhna hi a kar a zau hle.

Sir Alex-a thlirna
Man United-in Old Trafford-a an khelh hnuhnun berah Everton an mikhual a, 1-1 in an inhnehtawk. Inkhel bul ṭantu zingah Cristiano Ronaldo leh Paul Pogba an tel lo a, player ṭha pahnih hi bench-ah dah an ni.

Sir Alex Ferguson chuan UFC champion hlui Khabib Nurmagomedov leh khawvela tlan chak ber Usain Bolt te nen inkhel an en. Man United manager ropui hian, "Player ṭha ber luhtir tur," tiin Khabib bulah a sawi a, Solskjaer-a thutlukna a ṭawmpui lo.

Ronaldo hi minute 57-naah a rawn lut a, hetihlai hian 1-0 ni mah se Everton-in Andros Townsend-a hmangin minute 65-naah siphurh an sut. Goal dang luh belh loin 1-1 in inkhel a tawp.

Ferugson thlirnaah chuan Ronaldo-a'n bul a ṭan loh hian Everton an phur phah a, Portugal captain pawh hi inkhelh banah a hmel aṭangin a lungawi tawk lo tih a lang.

Ole a insawifiah
Inkhelh banah erawh Ole Gunnar Solskjaer a insawifiah a, chhan ṭha tak vanga bench-a ṭhu a nih thu a sawi. Norwegian manager chuan, "Kei leh amah hian expert aiin kan hrechiang zawk. Khelhtir hun leh hahdamtir hun thlan a ṭul. Naupang a ni tawh lo a, chutihrualin professional a nih angin inkhel turin a inpeih reng thung," tiin a sawi.

Football-a pawimawh ber chu chak a ni a, Man United hi an chak tak loah chuan manager tan insawifiah a ngaih phah. Man United hi tun hnaiah an result a ṭhat loh avangin Solskjaer ring lotu an pung hle.

Man United hian Ronaldo rawn let hnuah Newcastle United (4-1) leh West Ham (2-1) te league-ah hneh mah se Champions League match hmasa berah Young Boys an hneh lo a, League Cup-ah West Ham hneh loin an tla nghal bawk.

Old Trafford-a league match hnuhnung pahnihah point khat chauh an hmu a, Aston Villa an hneh lo hnuin Everton nen an inhnehtawk. Ole hote hian big six tia chhal club an la tum lo tihna a ni.

Hmabak chu
Man United hian match sariha point 14 hmu tura an khingpuite hi season liam taa pakuana Leeds United, Southampton (15-na), Wolves (13-na), Newcastle (12-na), West Ham (6-na), Aston Villa (11-na) leh Everton (10-na) te an ni.

October leh November thlaa Man United khingpui tur chu Leicester City (5-na), Liverpool (3-na), Tottenham (7-na), Manchester City (1-na), Watford (kaithar) leh Chelsea (4-na) te a ni dawn. League match karah hian Champions League match pawimawhah Atalanta leh Villarreal te an hmachhawn dawn bawk.

Solskjaer-a hote thla hnih chhungin team ṭha rual an hmachhawn dawn a, Norwegian manager hian result ṭha a nei lo a nih chuan a hna a chan thei hial ang. Chutihrualin Man United-in dinhmun siam ṭhat nan an hmang thei thung.

Mahse maw...
Man United hi tuna an khelh dan aṭanga thlir chuan insiamṭhat aiin tlakhniam lam an hnaih mah zawk. Solskjaer-a hote hian team nema ngaih an hmachhawn pawhin nuam sain an chak thei lo a, keeper David de Gea-a'n match tinah save ṭha a la nei ziah. Tlarhnung thuam chak nan Raphael Varane an lalut a, World Cup champion thei defender awm hnuah pawh Man United tlarhnung a la nghing nasa hle.

Midfield lai chu tlarhnung pawp chhana mawhpuh ber a ni a, Brazilian midfielder Fred-a'n sawiselna a dawng hnem ber. Chutihrualin Fred leh Scott McTominay te hi Solskjaer hnuaia khelh dan nghet an neih loh tuartu an ni thei a, attacking player zingah Donny van de Beek leh Jadon Sancho ten an theihna angin an la khel chhuak lo. Man United-in tun season-a nomawi an chawi dawn a nih chuan Norwegian manager Solskjaer-a'n international break a hman ṭhat a ṭul dawn a, thla hnih chhunga an result hian an hmalam hun thui tak a hril ang.