Nakkumah stadium khatin entu awm dawn

Italy sorkar chuan hri leng inkaihhruaina kalphung thar a duang a, nakkum aṭang chuan stadium khatin mipui an pungkhawm thei tawh ang - kumin tawp lamah chuan stadium leng zat aṭanga 75% an awm thei ang.

Tun dinhmunah pawh Serie A hi a hmunah entu an awm thei tawh, mahse chawhrualin 50% bak an la lut thei lo. Inkhel en tur pawh hian hmai tuamna vuah a ngai a, invenna an la tawh tih chhinchhiahna bakah inkhel en hma darkar 48 chhungin hri an kai lo tih fiahna a ngai bawk.

Italy hi hripui leng tuar nasa ram an ni a, a tirah tuar na viau mah se hri leng hi an thunun thei tawh. Euro 2020 an thlen theih bakah, Nations League an thleng dawn - Italian football thuneitu sang chuan sorkar hmalaknaah an lawm thu an sawi.